ريم رؤوف لـ تحيا مصر: تشرفت بتقديم شخصية صعيدية.. أحمد عيد ممثل مرعب.. ولم اتخوف من الظهور بدون مكياج| حوار

ريم رؤوف.. ممثلة أثبتت مقولة أن لكل مجتهد نصيب، لم يكن التمثيل ضمن مخططاتها، ولكن شاء القدر أن يوهب لشاشتنا موهبة جديدة، تدخل إلى القلوب بسرعة الضوء، نظرًا لأدائها التمثيلي الصادق التلقائي، بدأت خطواتها بمشاهد قصيرة مؤثرة، حتى أطلت علينا في الموسم الرمضاني 2023 خلال مسلسل عملة نادرة لتكون هي النجمة الواعدة الساطعة بين زميلاتها.

أجرى موقع تحيا مصر معها حوارًا خاصًا لتكشف لنا عن تفاصيل مشاركتها في عملة نادرة، والصعوبات التي واجهتها أثناء التصوير، بالإضافة إلى الكثير من الأمور الأخرى، وإليكم نص الحوار:

في البداية.. هل دخولك للتمثيل كان صدفة أم مخطط له ؟

مكنش مخطط ليه خالص، ومكنتش أعرف أنه عندي الموهبة، اللي حصل أن أنا كنت بشتغل في شركة إنتاج وكنت مديرة علاقات عامة لمدة 11 سنة وفجأة قررت أن أنا عايزة الاقي نفسي، روحت أخدت كورس غطس، وعملت تخييم، وبعدين بنتي هي اللي كانت عايزة تمثل، فاخدها وكالة كاستينج فقعدوا يقولولي حضرتك لازم تمثلي، ومن بعدها أخدت ورش تمثيل.

كيف جاء ترشيحك للمشاركة في مسلسل عملة نادرة ؟

السنة اللي فاتت عملت مشهد في مسلسل فاتن أمل حربي، وكنت تريند تويتر والناس كلها باركتلي وقالتلي مشهد حلو جدًا، وأستاذة نيللي كريم قالتلي أنتي عملتي مشهد حلو أوي وأثر فيا، ومن ساعتها لحد رمضان متواصلناش خالص، لغاية شهر 8 اللي فات لقيت أستاذ ماندو مرشحني لدور سميرة، فرحت جدًا وخوفت بس في نفس الوقت بحب التحدي.

كيف كان الانطباع الأول لديكِ بمجرد قراءتك للشخصية ؟

خوفت من المسئولية، ومصدقتش نفسي، ومترددتش خالص، لأن أنا بشوف لما الواحد ياخد قرار ويبقى عنده يقين بربنا ويجتهد، ويسعى أكيد ربنا هيكرمه وبيديكي اللي أنتي عايزاه.

كيف كانت تحضيراتك ومذاكرتك لشخصية سميرة ؟

سميرة شخصية صعبة، وكنت بدور ازاي امسك خط الشخصية، فابتديت أقرأ عن العادات والتقاليد الصعيدية الأول، وعملت ملخصات عنهم، وانبهرت بعاداتهم وتقاليدهم، وبقوتهم، وعرفت حاجات كتيرة عنهم، واتشرفت أن أنا ممكن ألعب شخصية صعيدية.

بعد كدا جينا لعائق اللهجة، واكتشفت أن كل بلد ليها لهجة، وكل شارع في كل منطقة ليه لهجة، وقعدت في بروفة الترابيزة مع الأستاذ الجميل عبد النبي الهواري، وهو اللي حط الخطوط بتاعت الشخصيات اللي على أساسها هنتكلم ازاي، واكتشفت أن الشخصية مش شريرة هي بدائية، اللي بيحركها مشاعرها وعواطفها، وفي بعدها النفسي هي متدمرة لأن نفسها مسعود يحبها.

ما وجه الشبه بينك وبين شخصية سميرة ؟

احنا الاتنين أقوية لكن غير كدا، أنا ضد العنف، ضد القتل، ووالله أنا لو جوزي عمل زي مسعود كدا ما هسيبوه، يمشي، ومعنديش درجة التمسك دي، خلاص مش عايزني باي باي، وأنا عكس سميرة تماما.

ما الصعوبات التي واجهتك أثناء تصوير مسلسل ؟

احنا بنصور في الحزام الأخضر، صحراء جرداء، البرد قارس، والحر حر أوي، والناموس مش طبيعي، والبحيرة دي مصرف ريحته بشعة، واللي كان بيهون علينا أن احنا صحاب كلنا، والصحبة كانت حلوة أوي، وأنا فخورة أني اشتغلت معاهم، وهما ناس طيبة جدًا، وكنا بنفرح لبعض.

حدثينا عن مشهد كيدك لمسعود - أحمد عيد - وقت زواج دميانة.

في المشهد دا اللوكيشن كله وقع من الضحك، ومكنتش محضرة للحركات اللي عملتها في المشهد، ومكنتش موجودة في السيناريو، وايديا ورمت وازرقت من كتر التصقيف، وأستاذ أحمد عيد كان فرحان بالمشهد وجالي مخصوص وقالي المشهد دا تحفة وهيعلم مع الناس جامد.

ما هي أكثر إشادة اسعدتك جاءت على دورك في عملة نادرة ؟

أي حد بيقولي برافو أنا بفرح، ولكن أكتر إشادة فرحت بيها من مامتي وبنتي.. ووالدتي رقيقة جدًا فقولتلها ايه الأخبار وكان بقالها قترة مش شايفاني، قالتلي اه حلو، بس بصراحة أنا خايفة منك.

هل كان لديكِ تخوف من الظهور أمام الشاشة بدون مكياج ؟

لا مكانش مسببلي مشكلة، أنا في العادي بنزل من غير ميكاب، ومش بحب الميكاب ولا بحب اعمل شعري، وبحب أبقى بطبيعتي، وبعدين أزاي هقدم كل الشخصيات دي وأنا بلعب في وشي وبغيره.

حدثينا عن وقوفك أمام الفنان أحمد عيد والكواليس بينكما

أنا من عشاق أحمد عيد ومن جمهوره، وهو كان واحشني وواحش الوطن العربي كله، وأول ما شوفته كنت فرحانة ومبهورة، وهو ممثل مرعب، وخطير، واستمتعت بالتمثيل قصاده، وبرا التمثيل هو متواضع جدًا، ومن أطيب الشخصيات، وذوق جدًا، وبيبقى عايز يساعد ويدي نصيحة.

هل استطعتِ الخروج من شخصية سميرة بعد انتهاء التصوير ؟

وأنا بصور كنت بقلب سميرة في البيت، ولكن دلوقتي لا عايزة أرجع ريم، وساعات سميرة بتوحشني وبفتكرها كأنها ذكريات عندي، وصعبانة عليا، ومازالت جوايا.

هل سنرى ابنتك تمثل في عمل فني قريبًا ؟

مش عارفة، هي بترسم وبتمثل بس أنا بسيبها براحتها، وطول عمري سايبلها حرية الاختيار تماما، وخصوصًا لو موهوبة، ومش هيكون عندي مانع لو جاتلها فرصة التمثيل لو هي موهوبة وشاطرة.

وأنا أصلا من عيلة فنية وعمري ما فكرت في الفن، يعني أنا ولاد عمة والدي عيلة ذو الفقار، وخال والدي إيهاب نافع زوج ماجدة، بس عمري ما فكرت في التمثيل، ووالدتي كانت بتقول عليا وأنا صغيرة أمينة رزق.

هل توجد أعمال جديدة تحضرين لها في الفترة القادمة ؟

صورت في مسلسل روز وليلى هينزل قريب، ومشهد في فيلم مستر إكس هينزل في العيد.