طارق النهري: محمد سامي بيسيطر على طوب الأرض في اللوكيشن.. وأحمد داش ممثل قوي

تحدث الفنان طارق النهري عن عدد من فريق عمل مسلسل جعفر العمدة، كالمخرج محمد سامي، والنجم محمد رمضان، والفنان أحمد داش.

تحيا مصر يرصد تفاصيل تصريحات طارق النهري عن جعفر العمدة

طارق النهري وفريق عمل جعفر العمدة

وقال النهري في تصريحات خاصة لموقع تحيا مصر: كلنا نجوم في المسلسل لأن فيه مخرج واعي وفيه ورق كويس، وفيه ممثلين حابين يعملوا العمل بالشكل دا، احنا كنا بنتلقى التعليمات من المخرج وبننفذها بحذافيرها زي ما هو عايز.

وتابع: محمد سامي مخرج واعي وبيسيطر على اللوكيشن والمجاميع وعلى طوب الأرض اللي في اللوكيشن.. كان معانا في الحارة كل يوم ألف كومبارس، وكانوا عايزين يتصوروا مع محمد رمضان، وكان بياخدها بكل حب، وبياخدهم في حضنه وبيتصور معاهم، ومحمد رمضان اسمه ينجح عمل وهو نجم مش عادي وهو نمبر وان.

رأي طارق النهري في أحمد داش

وفي الحوار ذاته، كشف الفنان طارق النهري عن رأيه في وضع اسم أحمد داش قبل عدد من النجوم في تتر مسلسل جعفر العمدة، وقال: مفيش عمل بينجح من طرف واحد، لازم الأطراف كلها تجتمع على النجاح.

وتابع: أحمد داش مش محتاج مجاملة، أحمد داش فنان جامد أوي وممثل قوي جدا، أنا بقالي في المهنة دي 45 سنة، وبقول داش من أعلى النجوم اللي هتبقى في تاريخ السينما والتلفزيون في مصر.

واستطرد: وهو مش بيقلد محمد رمضان، لأنه ممثل فاهم وواعي، ومفيش حد يقدر إلى ما وصل إليه أحمد زكي من فن.

تصريحات أحمد داش عن جعفر العمدة

وفي وقت سابق، كشف الفنان الشاب أحمد داش عن تفاصيل كواليس مسلسل جعفر العمدة، مع النجم محمد رمضان، والمخرج محمد سامي، وذلك في حوار له مذاع على الصفحة الرسمية لشركة ميديا هب - سعدي جوهر عبر فيسبوك.

حيث قال داش: اشتغلت مع محمد سامي 3 مرات، الكواليس جميلة، يعني الحمد لله، المسلسلات مع سامي بتبقى ناجحة، وهو مخرج تجاريًا ناجح بشكل كبير، وبيعرف يوصل للناس، وبيديهم الحاجات اللي عايزين يشوفوها وهما قاعدين في بيوتهم، وبيعرف ينجح مع الشارع بشكل كبير.