البلوجر محمد فرج يعلن انفصاله عن زوجته: كل شئ قسمة ونصيب ومش هسمع لحد يجيب سيرتها

أعلن الانفلونسر محمد فرج انفصاله عن زوجته نوران نصر، وذلك بعد زواج دام أكثر من عام ونصف، كما رفض الأفصاح عن سبب الانفصال.

تحيا مصر يرصد لكم انفصال محمد فرج عن زوجته

وكتب محمد فرج عبر حسابته بمواقع التواصل الاجتماعي: قل لن يصيبنا الا ماكتب الله لنا.. النهاردة انتهى زواج دام سنة و نص و علاقة دامت ٣ سنين مرت بحلوها و مُرها و تم الانفصال بشكل نهائي.

محمد فرج: احترموا الخصوصية وكل شئ قسمة ونصيب

وتابع: الاسباب و التفاصيل دة شئ يخصني انا و هي بس رجاء من كل الناس ماحدش له علاقة و احترموا الخصوصية، وكل شئ قسمة و نصيب و ربنا مش بيجيب حاجة وحشة دايما عندي يقين و ايمان بالله فالنقطة دي ف بكون مرتاح نفسيا و ضميري مرتاح.

محمد فرج: مش هسمح لحد يظلمها

واستكمل محمد فرج: رجاء من كل الناس و صحابي و معارفي مش عايز حد يكلمني فالموضوع ولا يحكم عليا او عليها و مش هسمح لحد انه يجيب سيرتها بكلمة عندي ولا يظلمها و لا يظلمني، لإني اكتر واحد عارف دماغ الناس و هايتكتب ايه و يتقال ايه.

وتابع: و اني عايز ريتش و خرة و كلام رخيص مش بتاعي خالص و مالوش علاقة بحياتي الطبيعية اللي في ارض الواقع و اسرتي و بيتي و اللي عارفني كويس يعرف كدة و انا بقالي اكتر من ٧ سنين موجود مش محتاج اعمل حاجة الحمدلله القبول موجود من عند ربنا .

محمد فرج: واخدين القرار بالتراضي وبمنتهى الاحترام

واسطرد: بس دة اخر همي الناس الفاضية و المريضة اللي ماعندهمش حياة و قد ايه الفضول بياكلها، وقرارنا واخدينه احنا بالتراضي و بمنتهى الاحترام و الادب.

وأضاف: كتبت الكلام دة لإني من الأول كنت بشارككوا كل لحظة حلوة عيشناها مع بعض  وواجب عليا اعرفكوا أن الموضوع انتهى و مش محتاج اقول هو صعب عليا ازاي بس ربنا زي ماقولت مش بيجيب حاجة وحشة، و هو دة المكتوب لنا و ربنا يوفقها في حياتها و يرزقها.

واختتم فرج: و ربنا يهدي الجميع و يبعد عن كل الناس اي شر، وربنا يقدرني و يوجهني و اعرف اعدي الفترة دي على خير.. ادعولي.