عمرو عبد الجليل: مش هساعد ابني في دخول المجال الفني وعمري ما كلمت مخرج عشان يشغلني معاه

تحدث الفنان عمرو عبد الجليل عن نجله الكبير عبد الجليل، كما كشفت عن كواليس بعض أعماله، وذلك خلال استضافته في برنامج حبر سري.

تحيا مصر يرصد لكم تصريحات عمرو عبد الجليل

وقال عمرو عبد الجليل: ابني محتاج مني زقه عشان يدخل مجال الفن وأنا مش عايز عشان أنا عايزه يعاني ويشتغل ويلاقي نفسه وهو معتمد عليا وأنا ضد الفكرة دي.

وأضاف: قولت لابني  روح ورشة بس متقولش أنا أبن عمرو عبد الجليل وأنا لما طلعت مقولتش أنا اخو طارق عبد الجليل، لأن الفنان محتاج أنه يعاني وأنا لو مدوقتش طعم الظلم مكنتش هعرف أعمل مشهد ظلم.

وتابع: أي فنان جديد لازم يعتمد على وموهبته مش الواسطة، وقولت لأبني روح قدم في مكان لو نجحت قول أنك ابن عمرو لو منجحتش متقولش أنك ابني، وهو قالي أنت بتتبرى منه وده مكنش قصدي.

عمرو عبد الجليل: قعدت سنين عشان أثبت إني كوميديان

وكشف: كنت عايز أكون كوميديان وكنت بقول على نفسي كده وكانوا بيقولوا أنت مالك ومال الكوميديا وقعدت سنين عشان أثبت إني كوميديان.

وكشف عن موقف تعرض له وأثر فيه للغاية وقال: كنت شغال والبطل على علاقة أسرية بيا و قال في الكواليس أنهم جايبني عشان أخويا ولو أخوه مش موجود مش هنجيبه، وهو مكنش يعرف إني سمعته والموقف أثر فيا.

كما تحدث عن أخوه الشيعي وأيه في الفن وقال: اخويا مقاليش الفن حرام ومقالش للناس أن الفن حرام.

وكشف عبد الجليل: الأدوار اللي أنا عملتها محلمتش بيها وممكن أحلم بحاجات متجيليش وبحب أحلم في المتاح بالنسبالي واللي موجود عشان مضايقش وأتعب، ونفسي أقدم شخصية محمد علي وبحب الأعمال التاريخية، ودلوقتي نادرًا ما بيعملوا أعمال تاريخية، وأنا مش بحب أتفرج على التليفزيون في رمضان لأنه شهر عبادة. 

عمرو عبد الجليل: بحب أقعد مع حالي ومركزش مع الناس

وأوضح: أنا قاعد في حالي زي ما أنا ومش بحب أركز مع الناس، الماديات دي أرزاق بتاعت ربنا وأنا راضي برزقي، والمستقبل في أيد ربنا، وعمري ما رفعت سماعة تليفيون على مخرج وقولتله عايز اشتغل وعملتها مرة واحدة ومشغلنيش.

وأضاف: رزقي هيجيلي وفي ناس بتكلم مخرجين وبيبقى سمعتهم وحشة، وأنا مش عندي شلة صحاب في الوسط الفني أو بره الوسط.

أعمال عمرو عبد الجليل

يذكر أن آخر أعمال الفنان عمرو عبد الجليل هو مشاركته في مسلسل سره الباتع، والذي يعرض ضمن السباق الرمضاني الحالي، وشارك قفي بطولة العمل عدد كبير من نجوم الفن ومنهم: أيمن عزب، أيمن الشيوي، مفيد عاشور، مجدي فكري، محمد الصاوي، ميسرة، صبري عبد المنعم، عمر زهران، خالد طلعت، شريف حلمي، محمود عزت، عفاف مصطفى، هايدي سليم، ومن النجوم العرب الكويتية شمس، التونسية رانيا التومي، السوري نضال نجم، والفنانين الشباب خالد أنور، هدى الاتربي، ميدو عادل، ألحان المهدي، إسلام حافظ، رشا بن معاوية، شريف حافظ، تسنيم هاني، ميدو ماهر، ألفت عمر، سلمي جلال، عمرو موسي، فاروق خالد، عمرو عمروسي، محمود عزازي، محمود الشرقاوي، عمرو علاء، محمد حسن، أحمد فريد، المطرب مالك.