ريهام عبد الغفور: مش بستحمل الشخص البخيل والراجل بيخون لما بيبقى في تقصير من زوجته

كشفت الفنانة ريهام عبد الغفور أسرار عن حياتها الشخصية، كما تحدثت عن زوجها وعلاقتهما، وذلك خلال استضافتها في برنامج حبر سري.

تحيا مصر يرصد لكم تصريحات ريهام عبد الغفور

وقالت ريهام عبد الغفور: أنا كان عندي أزمة قلة ثقة في نفسي، والتمثيل حل أزمة ثقتي بنفسي وجوزي ساعدني في تخطي الأزمة بمساعدة الطبيب النفسي.

وتابعت: لما ببص للموضوع بحس أن ليه أنا كنت كده وأي كلمة كانت تأثر فيا، ولما حد قالي في المدرسة معجب بيكي عشان شكلك قمور فضلت أعيط وأضايقت عشان كنت فاكرة أنه بيضحك عليا.

وأضافت: ولادي بديهم تشجيع ولازم يثقوا في نفسكوا، ومكنتش باخد تشجيع من أهلي لكن غصب عنهم، لأن أنا كنت كتومة، احنا جيلنا غير اهليا وبنقرأ كتير ونقدر نحمي أولادنا من الحاجات اللي مش باينة.

وتحدثت عن لقب بيومي فؤاد الست وقالت:  الفترة دي صادفت أن الأعمال اتعرضوا لنفس الوقت ده كتير قدام الناس وسلاح ذو حادين، جالي أعمال في وقت كنت محتاجه فلوس.

ريهام عبد الغفور: قبل التصوير بصلي وادعي بسبب قلة ثقتي بنفسي

واستكملت: بختار أن الدور يكون مأثر ومختلف على الحاجات اللي عملتها قبل كده، وقبل التصوير بصلي كل الصلوات  وبدعي كل الأدعية  وبيجيلي بانك أتاك عشان ببقى خايفة.

كما تحدثت عن نجلها ومساعدتها له للدخول في عالم الإخراج وقالت: الناس مش بترحم ونفسي اشتغل مع ابني لما هو ميحتاجنيش عشان مفيش حد يقول أني بساعده، وهو لازم يثبت نفسه ويجتهد ومش لازم اتوسطله لأن ده مش كويس عشانه.

كما تحدثت عن زوجها وقالت: أنا ممكن أطلب فلوس من جوزي بس أنا مش النموذج اللي اعتمد على أي حد ومن وأنا صغيرة وأنا بتعامل أن الحياة مشاركة ومش بحب اعتمد على أي حد.

ريهام عبد الغفور: مش بحب الراجل البخيل

وأضافت ريهام عبد الغفور: مش بستحمل الراجل البخيل لأنها صفة مستفزة وممكن أقبل الراجل اللي مش معاه فلوس ومقبلش البخيل.

وكشفت ريهام عبد الغفور: الراجل بيخون لأن بيكون في تقصير من زوجته، وممكن اسامح زوجي لو خاني لو أنا قصرت في حقه

ريهام عبد الغفور في مسلسل الصندوق

ومن جانب آخر، تشارك الفنانة ريهام عبد الغفور في السباق الرمضاني من خلال مسلسل الصندوق، وتدور أحداث مسلسل "الصندوق" في عالم من الجريمة والغموض، وهو من بطولة أحمد داش، هدى المفتي، علي قاسم، سماح أنور، وعدد من ضيوف الشرف، وهو من تأليف مصطفى صقر، وإخراج مروان عبد المنعم.

مواعيد عرض مسلسل الصندوق

ويعرض مسلسل الصندوق عبر قناة mbc مصر في الساعة 9 مساء، ويُعاد في الساعة 11 صباحا، ويعرض عبر قناة mbc مصر 2 في الساعة 2 ظهرا، ويعاد في الساعة 12 منتصف الليل.