«سحر» أول مسحراتية سيدة في الدقهلية.. كبر سنها لم يمنعها من استكمال العمل

"إصحى يانايم وحد الدايم.. رمضان كريم" تلك الكلمات التى تنادى بها كل يوم سحر عويس ذات الـ ٥٥ عاما ابنة قرية اتميده التابعه لمركز ميت غمر فى محافظة الدقهلية منذ ٢٠ عاما والتى تعتبر أول سيدة تعمل بمهنة المسحراتى فى نطاق محافظة الدقهلية والتى لم يمنعها كبر سنها أو حجم القرية التى تعد من أكبر قرى ميت غمر بل قرى المحافظة حيث تعودت أن تطوف شوارع القرية يوميا بعد منتصف الليل مرتديه جلبابها وبيدها طبلتها لإيقاظ أهالى القريه لتناول السحور فالكل يظبط توقيته معها.

"أهلها مجبوش ياميش رمضان ".. تفاصيل مقتل ممرضة وهى حامل على يد زوجها بعد شهور من الزواج

"تحيا مصر" إلتقى سحر والتى قالت: عملى كمسحراتيه جاء صدفه منذ عشرين عاما كنت بشتغل أيامها فى مجال البناء بشيل طوب وخرسانة وبخدم فى البيوت علشان أساعد فى مصاريف المنزل لأن اتجوزت وانجبت طفلين إلا أن زوجى توفى وترك لى الحمل فاضطريت اعمل فى كذا مجال علشان أصرف على البيت.

أول مسحراتيه سيدة في الدقهلية

وتابعت قائله: فى مره من المرات حد من الأهالى قالى ليه متشتغليش مسحراتيه فكرت ولقيت فجأة حد جابلى طبله وبدأت اشتغل لأن مكنش حد فى البلد فقولت اجرب افضل من شغل المعمار وخدمة البيوت فبدأت اشتغل ولقيت الكل بيشجعنى وبيحبنى وفضلت على كده من ٢٠ سنه والكل مبسوط وفرحان بيا ".

وأضافت سحر، بدءت أطور من نفسى و احفظ اغانى خاصه بسيد مكاوى وبقى الكل مبسوط وانا ماشيه بسحر وبغنى وكمان لانى من اهل البلد وحافظه الأسر والأطفال كنت بنده عليهم بالاسم قدام بيوتهم والكل كان بيستنانى أعدى عليهم علشان انده عليهم وبالذات الاطفال اللى كان بيجو ورايا ويلفو البلد رغم انى بنزل متأخر بعد منتصف الليل.

وتابعت قائلة، بعد تقدمى فى السن حاول بعض الناس أنهم يشتغلو المهنه مكانى لكن الأهالى رفضو وقالو عاوزينك تفضلى وانا بجد رغم كبر السن الا انى بحب مهنة المسحراتى وقررت اكمل واستحمل لإنى بحس بسعاده وانا ماشيه فى البلد بسحر الناس وانا هفضل كده لاخر نفس فى عمرى بس اللى يتمناه قبل ما اقابل رب كريم انى ازور بيته الحرام ".