زينب العبد: كنت مرعوبة من اللهجة الفلاحي في مسلسل حضرة العمدة.. وعمري ما رضيت عن نفسي| حوار

تألقت الفنانة زينب العبد في جميع مشاهدها أمام روبي والفنانة القديرة سميحة أيوب، خلال مسلسل حضرة العمدة الذي يعرض حاليًا على شاشة تلفزيون قناة الحياة.

وأجرى موقع تحيا مصر معها حوارًا خاصًا لتكشف لنا عن تفاصيل شخصيتها في المسلسل، وملامح الكواليس التي جمعتها بـ روبي، والكثير من الأمور الأخرى، وإليكم نص الحوار:

ـ في البداية.. ما الذي حمسك للمشاركة في مسلسل حضرة العمدة ؟

المسلسل مكنش على البال ولا على الخاطر، وفي وقت كدا لقيت أستاذ ريمون مقار بيكلمني، وقالي في دور كذا وكذا ولطيف جدًا والمنفذ هيكلمك، وبالفعل كلموني.

واتبسطت أوي لأني أول مرة أشتغل معاهم.. أنا أعرف أستاذ ريمون من كذا سنة وهو مديني جايزة أحسن ممثلة في المسرح بتاع مهرجان نون النسوة، ومشتغلناش مع بعض قبل كدا، وهي شركة وشها حلو على ناس كتير.

ـ حدثينا عن التعاون والكواليس بينك وبين النجمة روبي ؟

روبي قمر جدًا، نفسها هادي في الشغل، ولذيذة ومحترمة، ومشوفتش منها حاجة وحشة، وفي حالها جدًا، وحبتها في الشغل، ومن الكواليس أكتشفت أنها هادية، وأنا أصلًا من فانزاتها.

ولما شوفتها اتفاجئت لأني لاقيت هدوء الدنيا.. مش دي الشعنونة اللي بشوفها على التلفزيون، وهي من الناس اللي قبولها مبيختلفش عليه اتنين.

ـ كيف كانت تحضيراتك للشخصية.. وهل كان لديكِ تخوف من اللهجة ؟

ذاكرت عادي زي ما بذاكر أي شخصية.. بس مشكلتي كانت في الفلاحي، أنا عمري ما اتكلمت فلاحي قبل كدا، ولا مثلت حاجة فلاحي وكنت مرعوبة، وبحاول وأنا عارفة أن الفلاحي بتاعي قالب شوية.

بس أنا قولت مباح لمستورة لأنها مفتوحة على العالم وبتقعد على الإنترنت، فبيني وبين نفسي قولت مفيش مشكلة لو اللكنة مظبوطة.. كدا كدا الشخصية مفتوحة على العالم.

ـ حدثينا عن وقوفك أمام النجمة القديرة سميحة أيوب.. وما الذي تعلمتيه منها ؟

النجمة سميحة أيوب قمر، ربنا يديها الصحة، وبتعرف تسلم اللي قدامها كويس، وبتعرف تاخد منه، ودا بيخلي الدنيا طبيعية أوي، وهي بتعرف تتعامل مع كل الأعمار، أنا بتعلم منها من زمان، لما كنت صغيرة.

ـ ما هي أكثر إشادة اسعدتك على شخصيتك.. ومن مَن ؟

أكتر الإشادات من صحابي لما بيتفرجوا، وفيه ناس معينة ببقى عارفة أنهم مش بيعرفوا يجاملوا بحب أسمع رأيهم فبسمع الكويس، وبسمع ايه اللي كان محتاج يتخدم أكتر.

وببقى مهتمة بالناس دي أكتر عشان أغير من جلدي، والمجمل كل الناس مبسوطة جدًا، كل اللي كلموني وكل اللي بعتولي أن أدائي كان حلو جدًا، وطبيعي ودا اللي أنا بحبه.

ـ هل تشاهدين أعمالك أثناء عرضها على شاشة التلفزيون ؟

مش بعرف أتفرج على نفسي أصلا بس ببقى مضطرة أجيب المشاهد حتى لو مش متابعة المسلسل، عشان أشوف ايه الغلط اللي فيا.

وبقعد أسأل كذا حد هل المشهد دا تمام، مش تمام، لطيف، ايه اللي ناقصه، وأنا بحب أسأل، وعمري ما رضيت عن نفسي فأي حاجة، حتى لو الدنيا كلها قالت حلوة.