مبتفهمش الهزار.. زوج للقاضى: مراتى حساسة ولما بنكشها بتطلب الطلاق

رفعت عليا خلع عشان قولتلها هتجوز عليكى وكنت بهزر معاها ..بتلك الكلمات روى زوج لتحيا مصر من داخل محكمة الأسرة عن زوجته ذو الطبع الحساس حيت تتقلب مشاعرها للغضب والبكاء من أبسط التصرفات والجمل حتى لو كانت فى سبيل المزاح .  

دم العذراء والمقبرة الفرعونية.. إعترافات قاصر الجيزة: أبويا وداني للدجال عشان يغتصبني

رعب في قلب القاهرة.. طفل مكفن يسيل منه دماء على ظهر ميكروباص

مراتى خسرت ناس كتير بسبب طبعها 

بدأ الزوج حديثه لتحيا مصر :" انا ومراتى متتجوزين من 6 سنين وعندنا ولد مراتى طبعها حساس وبتاخد كل الكلام على إنه جد ومبتعرفش تميز بين الحقيقة والهزار وده خسرها ناس كتير حواليها وكانوا بيحبوها بسبب أنها كانت بتسئ الظن فيهم وكانت بترجع تشتكيلى منهم وتقولى أنهم بيجرحوها بالكلام دايماً وبما فيهم أخواتها ومهما بحاول أقنعها أنهم بيهزروا معاها مش بتصدقنى وبتفتكر أنى باجى عليها عشان خاطرهم ".

حساسة ولما بهزر معاها بتطلب الطلاق  

وتابع الزوج حديثه :" مراتى على مدار السنين اللى عيشتهم معاها كانت حياتى معاها دايماً نكد وبهدلة بسبب أنى كل ما بهزر معاها بتطلب الطلاق وتبقى منهارة وممكن تسيبلى البيت بالأيام مع أنى مش بيبقى قصدى أزعلها قولتلها فى مرة بهزار أن اللبس وسع عليها ومحتاجة تشترى غيره عشان شكلها مش باين من الهدوم واليوم ده كان مش معدى ووقفنا فيه على الطلاق بسبب أنها أفتكرت أنى بعيب على جسمها  ومرة تانية كانت عاملة " كيكة " وكانت مش حلوة وسكرها قليل جداً فهزرت معاها وقولتلها " أنا هاكلها عشان من أيديكى بس متعمليهاش تانى " فضلت تبكى وأفتكرتنى بقلل من شطارتها فى المطبخ وسابتلى البيت وقالتلى " انا هروح عند والدتى وهستنى ورقة طلاقى عشان أنت دايماً بتقلل منى وبتجرحنى ومش مقدرنى " ولولا أنى طلبت من أهلها يتدخلوا ويهدوها مكنتش هترجع البيت تانى ".

رفعت عليا خلع عشان قولتلها هتجوز عليكى 

وأختتم الزوج حديثه :" كنت قاعد مع مراتى فى مرة وبنتفرج على مسلسل وكان الممثل فيه  متجوز أربعة روحت قولت لمراتى بهزار " هو أنا لو اتجوزت عليكى هترضى تعيشى معايا وتفضلى على ذمتى ولا الممثلين دول بيضحكوا علينا ؟" واليوم ده خناقها وصوتها العالى وصل للجيران بسبب أنها أفتكرتنى بطلت أحبها ومبقيتش مكتفى بيها وأفتكرتنى كمان شايفلى شوفة تانية وبلمحلها بالموضوع وأنا برئ من كل ظنونها فيها دى وكان كل غرضى أضحك واهزر معاها مراتى سابتلى البيت ورفعت عليا دعوى خلع وأنا مش زعلان من ده بالعكس حاسس أنى هرتاح منها ومن دماغها الصغيرة ونكدها اللى مبيخلصش ".