مأساة زوجة: حماتى جابتلى ضرة قبل رمضان وبتقولى حضروا الفطار مع بعض

حماتى طول الوقت بتعايرنى بظروف أهلى المادية وجابت عروسة لجوزى وعيشتها فى بيتى ... بتلك الكلمات روت زوجة لتحيا مصر من داخل محكمة الأسرة عن والدة زوجها التى لم تتقبلها لأبنها بسبب وضعها المادى البسيط حتى وصل بها الأمر إلى أنها زوجت إبنها لفتاة أخرى وأحضرتها لتعيش مع الزوجة الأولى فى منزل واحد مما أشعل الغيرة فى قلب الأخيرة وقررت الأنفصال عنه .

مأساة زوجة: جوزى طلقنى عشان رفضت أعزم أخوه على الفطار في رمضان

عشان ياخدوا راحتهم في الحرام.. الثلاثينية خططت وعشيقها أزهق روح زوجها في كفر الشيخ

أهلى جوزونى عشان يلاقوا حد يصرف عليا 

بدأت الزوجة حديثها لتحيا مصر :" أنا وجوزى متجوزين من  سنتين وعندنا بنت جوزى كان معجب بيا قبل الجواز بسبب سمعة أهلى الطيبة فى المنطقة عشان هو يبقى جارنا من زمان ولما جه وطلب أيدى للجواز من والدى ووالدتى وافقوا عليه عشان يستروا عليا مع أنى مكنتش أعرفه كويس ولا كنت حاسة بمشاعر ناحيته بس أحنا ظروفنا المادية على قدنا بسبب أن والدى بيقبض معاش بسيط ووالدتى كبيرة فى السن ومريضة وأخواتى المتجوزين عايشين حياتهم بعيد عننا وبيبعتولنا مساعدة ومبلغ بسيط من فترة للتانية نمشى بيه حالنا وعشان كدة جوازى تم بسرعة ومن غير تفكير ".

حماتى بتعايرنى طول الوقت بظروفى 

وتابعت الزوجة حديثها :" بعد الجواز علاقتى بجوزى أتدمرت بسبب حماتى وعدم حبها ليا اللى مليش ذنب فيه حماتى عايشة معانا فى نفس البيت وأنا كنت راضية بده لكن هى لما عرفت ظروف أهلى المادية بقيت طول الوقت بتعايرنى بيها وبتقولى " كل الستات اللى لسة متجوزة جديد أهاليهم بيجبولهم مواسم وفاكهة وحاجات تكفى البيت شهر بحاله وأنتى أهلك مدخلوش علينا حتى بحاجة تتشرب " وبتسخن كمان جوزى عليا طول الوقت وتقوله " هى دى اللى أنت هتعيش تصرف عليها بقيت عمرك وعلى عيالها دى اتجوزتك عشان طمعانة فيك وفى فلوسك " وكانت بتهدده أن لو الوضع فضل كدة هتجوزه واحدة قبل شهر رمضان وتكون مرتاحة ومستواها كويس عشان تليق بيهم وجوزى كل ده مكنش بيدافع عنى وكان شايف أن كلام والدته هو اللى صح ".

جابتلى ضرة وقالتلى حضروا الفطار مع بعض فى رمضان

وأختتمت الزوجة حديثها :" حماتى نفذت كلامها ولقيتها داخلة عليا قبل شهر رمضان بواحدة وقالتلى أن جوزى كتب عليها على سنة الله ورسوله وأنها هتعيش معانا فى نفس البيت عشان ده من حقها وقالتلى " أنا لو عليا أطلقك من أبنى بس أنتى عندك منه بنت وأنا مرميش لحم أبنى فى الشارع " وطلبت منى أعاملها كويس وأتقبل وجودها وخصوصاً أننا داخلين على شهر رمضان وأجبرتنى أنى أخدمها فيه لأنها عروسة جديدة وأننا نحضر الفطار مع بعض ولو الوضع مش عاجبنى أرجع على بيت أهلى وبالفعل ده اللى حصل لما متحملتش أن واحدة تيجى تشاركنى فى جوزى وكمان هو محسسنى أن مش مرغوب فيا فى بيته ولا من والدته وطول الوقت بيعاملونى على أنى أقل منهم فقررت أرفع عليه دعوى خلع فى محكمة الأسرة عشان أعرفه أن الست اللى أستحملته وأستحملت معايرته قدرت تستغنى عنه بسهولة عشان ترفع كرامتها فوق راسها ومتعيش تحت رجلين راجل مقدرهاش وعارفة أن ربنا هيكرمنى من واسعة عشان خاطر بنتى وهدور على شغل فى كل مكان حتى لو هشتغل فى البيوت طالما شغل حلال ومش هيغضب ربنا ".