بتستغفلني.. مأساة زوج: مراتى بتخلع الحجاب برة البيت وعرفت من الفيسبوك

مراتى طلعت بتضحك عليا ومفهمانى أنها محجبة و هى عايشة حياتها وبتلبس اللى على مزاجها ...بتلك الكلمات روى زوج لتحيا مصر من داخل محكمة الأسرة عن زوجته التى أكتشف أنها تخرج بدون حجابها وشاء القدر أن يفتضح أمرها من خلال منشور مع صديقاتها على الفيس بوك ظهرت فيه بملابس غير لائقة وشعر مكشوف .

حادث مميت.. تصادم 4 سيارات ملاكي على كوبري أكتوبر في القاهرة|صور

شاهدها عارية في أحضان عشيقها.. تعويض زوج بـ 100 ألف جنيه|حيثيات

كنت بحب فى مراتى الأحتشام 

بدأ الزوج حديثه :" أنا ومراتى متجوزين من 10 سنين وعندنا بنتين أتعرفت على مراتى فى الكلية لما كنا زمايل فى قسم واحد ودفعة واحدة وكانت هى وقتها مميزة بإحتشامها وهدوئها وإحترامها وده اللى حببنى فيها وخلانى عايز أتعرف عليها لكن هى مرضيتش تتعرف عليا غير فى إطار الدراسة وده جذبنى ليها أكتر وطلبت منها رقم والدها عشان أطلب أيديها للجواز فى آخر سنة دراسة وهى وافقت على طول لأن كان فيه قبول جواها ناحيتى ".

صورة لمراتى على الفيس كشفتلى حقيقتها 

وتابع الزوج حديثه :" عيشت مع مراتى 10 سنين فى نعيم وهنا مش هنكر أنها كانت زوجة مثالية وعمرها ما قصرت فى حقى ولا حق أولادها لحد ما حصل اللى دمر علاقتى بيها بعد كل العشرة دى لما فتحت الفيس بتاعها على  تليفونها فى مرة وكنت بقلب فيه ولقيتها متصورة مع شلة ستات من اللى كانت تعرفهم أيام الدراسة وكانت متصورة معاهم فى مطعم بشعرها ولابسة فستان مكشوف وهما كمان لابسين زيها ومفيش ولا واحدة منهم بالحجاب وكانت الصورة دى هما ناشرينها وكاتبين أسامى بعض وطبعاً مراتى كانت مطمنة لأنها عارفة أنى معرفش حد من الستات دى وبالتالى مش هوصل لصفحاتهم ولا هشوف هما بينزلوا أيه ".

لما واجهتها قالتلى كنت بفك عن نفسى 

وأختتم الزوج حديثه :" بعد ما شوفت الصورة دى سألت مراتى " أية دة ؟ وأزاى تخرج من غير أذنى وكمان قالعة حجابها ولابسة كدة ؟ " قالتلى " كنت بفك عن نفسى شوية من روتين وقعدة البيت مفيهاش حاجة يعنى " محستش بنفسى غير وأنا بديها علقة موت راحت سابتلى البيت والعيال وراحت غضبت عند أمها تعمدت انى اسأل عليها الجيران بعد ما هى مشيت رغم أن علاقتى بيهم سطحية وكل واحد فى حاله وقالولى أنها بقالها حوالى 5 سنين بيشوفوها من غير حجاب لما بتنزل وأنا مش موجود بس محدش منهم أتكلم وحسبوها حرية شخصية وتوقعوا أنى أكيد هبقى عارف عشان جوزها وعايش معاها فى بيت واحد رفعت على مراتى دعوى إنذار لبيت الطاعة ومش مسامحها على كل لحظة كنت شايفها فيها فى صورة وطلعت بتستغفلنى وعايشة بكامل حريتها من ورايا ".