خالد الجندي: بناء مصنع أفضل من إقامة 20 ألف مسجد.. فيديو

قال الشيخ خالد الجندي، عضو المجلس الأعلى للشؤون الإسلامية، إن مصلحة الإنسان مقدمة على الدين والشرع نفسه، بدليل إن ربنا لو في حاجة لمصلحة الإنسان بيقدمها على الشرع نفسه.

تحيا مصر

وأضاف الجندي، خلال حلقة اليوم من برنامجه "لعلهم يفقهون" المذاع على فضائية "دي إم سي"، اليوم الخميس، :" ابن القيم كان له كلمة رائعة وهي إذا تعارضت مصلحة الإنسان مع الأديان قدمت مصلحة الإنسان على الأديان".

افتتاح مصنع أسمدة أزوتية أهم بكثير من بناء 20 ألف مسجد

وتابع: "افتتاح مصنع أسمدة أزوتية أهم بكثير من بناء 20 ألف مسجد، معقبا:"المصنع هو اللى بيطلع لك العيش والمكرونة، فدول مش بيطلعوا من الأرض كدا، ولكن بيحتاجوا أسمدة، وإعداد تربة زراعية".

وتابع:" شيماء العزوري اللي بعتت الرسالة جاية توعظ اللي بيعمل لصالح الوطن ونسيت الستات زمايلها، اللي كل واحدة منهم بتجيب أربع بطون وخمس بطون وستة، احنا كل سنة بنزيدلنا بتاع 20 مليون، فالتتار اللي هياكل الأخضر واليابس مين اللي هيجهزلهم الأكل؟، مصنع الأسمدة اللي حضرتك جايه تنظري علينا وتقولي أصل بنا الإنسان أهم من بناء الطوب".

المصانع هتفتح بيوت وأراضى هتستصلح

وواصل الجندي حديثه: "مشغل الإنسان في بناء الطوب علشان يأكل ويطفح الإنسان، هو بناء الطوب هيتبني عن طريق جبرئيل وإسرافيل والملائكة ولا عن طريق ناس هيتفتح بيتوها وأرض هيتم استصلاحها لزيادة الانتاج وتوفير احتياجات المواطن المصري لرفع الأعباء عنه ".

واختتم بالقول:"المصانع هتفتح بيوت وأراضى هتستصلح، احنا مرينا بكل الأزمات العالمية وحتى الآن بفضل الله، مفيش أزمات جوع، مصلحتنا أهم من فتاوى الجنابة، فمصلحة بلدي ودعم القائمين على القرار في بلدي أهم مليون مرة من الحديث عن فتاوى الجنابة والنفاس، وقفوا رسايل الفزلكة، فالواحد منكم مش عارف يغير ترتيب الأنترية في أوضة الصالون وعايز يعدل على رئيس الجمهورية علشان يديله نصائح، وعجب".