مأساة زوجة: حبيبة جوزى القديمة ماتت ومن ساعتها وهو بيحلم بيها كل يوم ومش عارف ينساها

جوزى كان بيحب واحدة زمان ولما جالنا خبر موتها حياتنا كلها خربت ... بتلك الكلمات روت زوجة لتحيا مصر من داخل محكمة الأسرة عن زوجها الذى عاد ليتذكر حبيبته القديمة بعد أن وصل له خبر وفاتها وأصبح من وقتها يهمل حياته الخاصة مع زوجته وأطفاله وحتى فى عمله وذلك بسبب الكآبة الذى أصبح يعيش فيها دون وعى او حسبان لما سيترتب عليها .

إعترافات المتهمين بسرقة فيلا محمد صلاح أمام النيابة: الحالة على القد

رعب في فندق سياج.. جثة متحللة داخل بئر مصعد المبنى المهجور في الجيزة

جوزى كان عايش قصة حب قبل ما يعرفنى 

بدأت الزوجة حديثها لتحيا مصر :" أنا وجوزى متجوزين من 4 سنين وعندنا طفل كنا بندرس أنا وهو فى نفس المعهد وكان معانا واحدة زميلتنا كان المعهد كله عارف أن هى وجوزى كانوا بيحبوا بعض وأنا وقتها كنت لسة متعرفتش عليه لحد ما وصلنا لآخر سنة دراسة وسابوا بعض بسبب خلافات ومشاكل بينهم ومكنوش بيكلموا بعض وكل واحد فيهم بقى عنده أصحاب تانيين وفى الوقت ده بدأ هو يعجب بيا أنا وكان بيختلق اى فرصة عشان يكلمنى فيها وأنا بصراحة كنت معجبة بيه من أول يوم شوفته بسبب وسامته ومستواه المادى الكويس وعشان كدة كنت متجاوبة معاه وقربنا من بعض لحد ما حبنى وحبيته ".

بعد ما اتجوزنا حبيبته القديمة ماتت 

وتابعت الزوجة :" بعد ما حبينا بعض طلب منى ييجى هو وأهله ويطلبوا أيدى للجواز من والدى وبالفعل أتخطبنا وكتبنا الكتاب وجيبنا ولد وعنده دلوقتى 3 سنين والسنين اللى عيشتها مع جوزى كانوا من أجمل سنين عمرى لحد ما جالنا الخبر اللى غير حياتى كلها لما عرفنا من على الفيس أن حبيبة جوزى القديمة عملت حادثة على الدائرى وتوفت ومن ساعتها وجوزى حياته كلها أتغيرت وبقى أنسان تانى معرفهوش ".

بقى بيحلم بيها كل يوم ويبكى قدام صورهم 

وأختتمت الزوجة حديثها :" جوزى بعد ما وصله خبر موتها وهو طول الوقت حابس نفسه فى الأوضة ومش بياكل ولا بيشرب ولا بيكلم حد وكل ما أدخل أطمن عليه الاقيه فاتح صورهم القديمة مع بعض على التليفون وبيبكى عليها بأنهيار حتى شغله قصر فيه ومبقاش يروحه وعايش فى كآبة مستمرة بقالها 3 شهور لدرجة ان مبقاش فى فلوس فى البيت نصرف منها ووالدتى هى اللى بتبعتلنا الأكل والشرب أنا مش مصدقة أن جوزى أبو أبنى شايفاه قدامى كل يوم وهو بيعيط على واحدة زى العيال الصغيرة أنا عارفة أنه خبر صادم ومؤلم بس كان المفروض يبقى واعى عن كدة لبيته وأبنه وشغله ويعرف أن دى مشيئة القدر لكن الظاهر أنها كانت لسة عايشة فى قلبه وأنا فكراه نسيها رفعت على جوزى دعوى خلع عشان كرامتى مش هتسمحلى أعيش أكتر من كدة مع راجل عايشة فى قلبه ست غيرى وعوضى عند ربنا ".