طلعت مش نضيفة ومبتعرفش تطبخ.. مأساة زوج: إتجوزتها عشان تنسينى مراتى الأولى
ADVERTISEMENT
مراتى مش بتدينى حقوقى الزوجية وكل همها الفلوس... بتلك الكلمات روى زوج لتحيا مصر من داخل محكمة الأسرة فى بث مباشر عن زوجته التى تهمل فى نظافتها الشخصية وأهتمامها بمسئولية بيتها بسبب أنشغالها بجمع المال طوال الوقت مما وضع الزوج فى حالة نفور منها وأنتهى بهما الأمر إلى الطلاق والوقوف فى ساحات محكمة الأسرة لسداد النفقة .
اتجوزت مراتى عشان تنسينى طليقتى
بدأ الزوج حديثه لتحيا مصر :" أنا ومراتى اتجوزنا من 13 سنة وعندى منها 3 بنات اتجوزتها عشان تنسينى طليقتى الأولى وطبعاً سألت عليها وعلى أسرتها قبل الجواز والناس قالولى أن والدها إمام مسجد ووالدتها بتبيع جرجير وقولت مش مشكلة المستوى المهم أنهم ناس طيبين وخلال يوم واحد كنا لبسنا الشبكة وكتبنا الكتاب وعملنا الدخلة كمان عشان كنت حاسس أنى هضعف وهرجع لطليقتى الأولى بس هى كسرتنى وكان لازم أنساها بواحدة تانية ".
طلعت مش نضيفة ومبتعرفش تطبخ
وتابع الزوج حديثه :" مراتى بعد ما اتجوزتها وأتقفل علينا باب واحد أكتشفت أنها ست مش نضيفة هى شغالة مدرسة بتروح المدرسة الصبح وبعدها بتدى دروس خصوصية وطبعاً بعد المجهود اللى هى بتبذله ده كله الطبيعى أنها ترجع تستحمى وتهتم بنضافتها الشخصية قبل ما تقعد مع جوزها وعيالها لكن هى كانت بترجع من شغلها تنام بهدومها وريحتها بتبقى وحشة ودى كانت حاجة بتخلينى مش طايق المسها ولا أقرب منها وهى مكنش عندها وقت ليا أصلاً ده غير أنها كانت فاشلة فى المطبخ ولو عملت أكل بتحط فيه 2 كيلو ملح وكنت بقرف من أكلها جداً لكن هى كانت ست مفجوعة عادى وبتاكل اى حاجة ".
كانت بتحبس أبويا فى الأوضة وكل همها الفلوس
وأستكمل الزوج حديثه :" أنا والدى راجل مريض وكبير فى السن وكنت بطلب من مراتى أنها تهتم بيه وأنا برة فى الشغل وتحطله الأكل وفى مرة رجعت من شغلى فجأة قبل معادى ورجعت لقيتها حابسة أبويا فى الأوضة وقافلة عليه بالترباس لمدة 18 سنة لدرجة أنه عمل حمام على نفسه وكان قاعد بيبكى من قساوتها عليه وطبعاً هى عملت كل ده عشان ترتاح من خدمته كنت هطلقها يومها وأختى هى اللى منعتنى وقالتلى متخربش على نفسك وسامحها المرة دى وبالفعل سامحتها لكن أكتشفت كمان أنها ست مادية وكل همها الفلوس لما لقيتها بتشتغل ومش بتطلع لعيالها جنية واحد من شغلها لدرجة أنها جمعت 300 ألف جنية وحوشتهم لنفسها بس ".
أديتها نفقة 1000 جنية فضة
وأختتم الزوج حديثه :" مراتى جت فى يوم خدت كل متعلقاتها وسابت البيت ومشيت وخدت العيال معاها فعرفت أنها عايزة تنفصل روحت أتصلت بأختها ووالدتها وقولتلهم أنى هطلقها وبالفعل أنفصلنا من 3 سنين ووكلت المحامى أحمد عبد الرحمن محامى بمجلس الدولة والأستنئناف العالى عشان يترافع عنى فى القضايا اللى هى وجهتهالى وكان من ضمنهم قضية نفقة صغار روحت أنا بالفعل أديتها النفقة بتاعتها زى ما المحكمة حكمتلها بس أديتهالها 1000 جنية فضة مش ورق وده كان رد فعل بسيط على أذاها ليا وحرمانها لعيالى أنهم يشوفونى وحتى فى مواعيد الرؤية اللى هى مش بتلتزم بيها وبتجيبلى العيال تقضية واجب وخلاص أنا مش حزين عليها ولا على السنين اللى ضاعوا معاها أنا حزين على بناتى اللى بقوا مكسورين وتعبانين نفسياً بوجه لمراتى رسالة أن كل الطغينة اللى فى قلبك دى هتعود على بناتك فى المستقبل مش عليا أنا ".
جوجل نيوز
تطبيق نبض
