الأغاني حرام ليه؟.. خالد الفايد نجم ذا فويس يجيب: “بتخرج مشاعرك وبتتخيل نفسك مع اللي بتحبها”

حرص المطرب المعتزل خالد الفايد، نجم ذا فويس كيدز على توضيح سبب حرمانية الغناء، وذلك بعد إعلانه اعتزاله بشكل مفاجئ واتجاهه إلى الأناشيد الدينية.

تحيا مصر يرصد في ذلك التقرير تعليق نجم ذا فويس على حرمانية الغناء

خالد الفايد: الأغاني بتحرك مشاعرك وبتزيدها وبتخليك تتخيل نفسك مع اللي بتحبها

وكتب خالد الفايد عبر حسابه الرسمي بموقع التواصل الإجتماعي “فيسبوك”: “لحظة تفكر.. الأغاني حرام ليه؟، اولا كدا يصديقي لما بتشوف واحده معاك في الدراسة او الشغل او اي مكان وتعجبك وتنجذب نحيتها بتحاول تخرج مشاعرك في الأغنية اللي بتسمعها وبالعكس انت لما بتسمع اغاني اصلا مشاعرك مش بتخرج دي بتزيد وكلمات الاغنيه بتخليك تتخيل وانت معاها وماسك ايديها وكل الحاجات الوحشه دي”.

وتابع حديثه: “طبعا يا صحبي بتسمع الاغنيه من هنا وكاظم الساهر اللي جواك بيصحي ويشوف الحياه بقا جميله والدنيا وردي وبتروح تقول للبنت ممكن نتعرف .. وطبعا انتوا الاتنين ف البطيخ خالص يعني".

خالد الفايد لـ مستمعي الأغاني: لازم تتقوا الله شوية

وأضاف: “تفضلوا تسمعوا اغاني توصف حالتكم دلوقتي ف الاغاني تهيج مشاعركم المراهقه اللي جواكم اللي هي للاسف بتتأثر بأقل شيئ تتعرض ليه والله ودا مش غلطكم لانكم في مرحلة طبيعتها كدا لكن لازم تتقوا الله شوية في نفسكم”.

واختتم: “المهم تفضلوا تتكلموا وتحبوا بعض وانا بموت فيكي وبتاع لحد ما ييجي حماده يشقطها منك وتخونك وتتجرح يعني بسلامتك وهنا تبدأ الاحاسيس والمشاعر الكئيبه تسمع بقا يباشا تامر حسني وعمرو دياب وهذه الكائنات الرومانسيه الحساسه اللي قلبها يا عيني ضعيف ومجروحين ..فنانين بردو ..وانت يا عيني تكتئب وحياتك دمار وضياع ومتاكلش وتعتزل الناس نسأل نفسنا سؤال بقا ونقول اي السبب في دا كله الاغنيه اللي سمعتها في الاول يبرنس”.

اعتزال خالد الفايد نجم ذا فويس كيدز

وكان قد أعلن مطرب ذا فويس كيدز اعتزاله عبر حسابه الرسمي بموقع التواصل الإجتماعي “فيسبوك”، حيث كبت: “أرجوكم محدش يقولي غني تاني كفاية بجد مش عايز فلوس ولا شهرة ولا علاقات ولا أي سراب من ده كله”.