زوج بمحكمة الأسرة: مراتى زنانة وبتتصل بيا كتير فى الشغل وكنت هترفد بسببها

“مراتى بتتصل بيا فى الشغل تسألنى على حاجات تافهة وتعبت منها” ... بتلك الكلمات روى زوج لتحيا مصر من داخل محكمة الأسرة عن زوجته التى تضعه فى مواقف حرجة أمام زملاؤه فى العمل بسبب كثرة أتصالاتها على أمور لا تستحق مما دعي الزوج ينفر منها ووصل بهم الأمر إلى عدم التفاهم والأنفصال .

تحيا مصر

لسة متجوزين جديد 

بدأ الزوج حديثه لتحيا مصر :" أنا ومراتى لسة متجوزين من سنتين بس ومأنجبناش أطفال طول السنتين دول عيشت مع مراتى فيهم حياة مليانة ضغط وزن 24 ساعة والطبع ده كان باين عليها أيام الخطوبة لكن مكنش بالدرجة دى وكنت بقول لنفسى يمكن عشان بتحبنى وأنا بعيد عنها فبتحب تكلمنى كتير عشان تحس أنى قريب منها لكن بعد الجواز الموضوع زاد عن حده وبقيت كل نص ساعة تكلمنى ".

بتتصل بيا عشان حاجات تافهة

وتابع الزوج حديثه :" مراتى فى فترة الجواز كنت بلاقيها وأنا فى الشغل تتصل بيا عشان تسألنى على حاجات ملهاش لازمة زى مثلا " البس أية وأنا رايحة السوق ؟" .. " عايز الفراخ محمرة ولا مسلوقة ؟" .. " أنا زهقانة وقاعدة لوحدى وعايزة أرغى معاك شوية " والموضوع وصل كمان أنها بقيت بتشتكى أهلى ومعاملتهم معاها طول الوقت وممكن تتصل بيا مخصوص عشان تقولى " أنا حاسة أن أختك بتغير منى " وفى مرة كلمتنى تقولى " أنا حاسة أن حماتى مش بتحبنى ومش هروح أزورها تانى غير وأنت موجود " كل ده كان بسببلى ضغط فى الشغل لأنها كانت بتتصل بيا فى أوقات محتاج أركز فيها أنا شغال فى خدمة العملاء وشغلنا بيتطلب مننا  منمسكش التليفون كتير عشان ده ميأثرش علىى شغلنا وفهمتها ده أكتر من مرة وطلبت منها تقلل أتصالاتها شوية ومبتسمعش كلامى وبتفضل تعيط زى العيال الصغيرة وخصوصأ أنها حساسة جداً فبضطر أخدها على قد عقلها  ".

ضحكت عليا زمايلى والمدير هددنى بالرفد بسببها 

وأختتم الزوج حديثه :" فى الفترة الأخيرة مراتى أتسببتلى فى خصم من مرتبى لما المدير شافنى وأنا بكلمها فى التليفون والمكالمة وصلت لنص ساعة ونسيت شغل مهم جداً كان ورايا راح زعق فيا قدام زمايلى كلهم وضحكهم عليا وقالى المرة الجاية لو الموقف ده أتكرر تانى أعتبر نفسك مرفود وفى نفس اليوم ده روحت البيت وقولتلها " أنا كنت هترفد بسبب زنك ورغيك معايا فى التليفون وأنا فى شغلى أنتى زوجة تافهة وعاملة زى العيال الصغيرة وكل ده أنا كنت بحاول مقساش عليكى عشان مجرحكيش لكن من النهاردة خلاص مش عايزك على ذمتى لحظة كمان أنتى عاملة كدة وأحنا لسة حتى مخلفناش عيال أومال لما نخلف ومسؤلياتنا تكبر هتعملى فيا أية ؟" روحت رميت عليها يمين الطلاق وجيبت مأذون يطلقنا رسمى  ورجعت أعيش مع والدتى وفعلاً من جوايا حسيت أنى أخطأت فى أختيار الزوجة اللى تكمل معايا حياتى  وبعد شهر من طلاقنا عرفت أنها حامل وجابت ولد ورفعت عليا دعوى نفقة وأنا قررت أسلملها النفقة فى المحكمة عشان خلاص مش عايز تواصل بينى وبينها تانى عشان عارف أن عندها عشم كبير فى الرجوع وكل مرة بتكلمنى بتتحايل عليا نصلح الأمور لكن أنا خلاص خدت قرارى ".