كان عندي 5 سنين.. فاروق فلوكس يكشف تفاصيل إنضمامه للإخوان في الطفولة

تحدث الفنان فاروق فلوكس عن تفاصيل انضمامه لجماعة الإخوان في طفولته، وذلك خلال لقائه ببرنامج الستات مايعرفوش يكدبوا. 

تحيا مصر يرصد لكم تفاصيل اخر تصريحات فاروق فلوكس

فاروق فلوكس وانضمامه للإخوان

وقال فاروق فلوكس: أنا كنت ساكن في ميدان عابدين لما كان عندي 5 سنين فكان الإخوان بيمشوا لابسين لبس كشافة وكان عاجبني اللبس والشكل ده وقولت أنا عايز أنضم ليهم، وعرفت إن فيه شارع بعدنا كان ليهم مكان فيه وقولت لوالدي أنا عايز أنضم ليهم علشان أمشي في الطابور ده، قالي اللي أنت عايزه اعمله واللي أنت شايفه صح اعمله واللي تلاقيه غلط أو خطر تعالا قولي.

فاروق فلوكس: حضرت خطبة لحسن البنا.. وكان همي الشكل واللبس 

وتابع فلوكس: لما روحت وانضميت لقيتهم بيقعدونا شوية أو يحفظونا قرآن، وبعدين أنا عايز استلم اللبس عشان أمشي معاهم في الطابور، قالولي هنروح نحضر خطبة للشيخ حسن البنا، وروحنا في الدرب الأحمر في مقرهم الأساسي، وطبعًا أنا مكنتش عارف حاجة كان كل همي اللبس والشكل. 

وأضاف: حسن البنا ده إنسان طويل كده ولابس بالطو وطربوش وصوته جهور، وكان بيقول حاجات أنا مش مُلم بيها ولكن فيها آيات قرآنية وأنا راجل بحب ديني.

فاروق فلوكس وكواليس تدريبات الإخوان 

واستطرد فلوكس: نزلونا في البدروم وكان كله رمل، وكان فيه سلك شائك وإدونا عصاية غلية وقالولنا إسحفوا على الرمل وحاولوا تعدوا من تحت السلك الشائك، وأنا محبش حد يفرض عليا رأيه وكمان دي مش طبيعتي وأنا مش عدواني ومش ده الهدف اللي رايح علشان أنا كنت رايح علشان الدربوكة، وعملت التجربة الأولى والسلك الشائك شد في هدومي، وبعدين خرجنا من التجربة قولتلهم هروح أنضف هدومي وهاجي تاني، وروحت حكيت لوالدي اللي حصل قالي أنت إيه رأيك؟ قولتله أنا مش رايح تاني ومروحتش تاني.

واستكمل فلوكس كلامه: بعتوا يجبوني قولتلهم لأ أنا مش عايز أجي وحالتي الصحية مش هتسمح، وفضل كرهي لهذا المكان لغاية ما روحت ثانوي، لحد ما قابلت واحد تاني كان لما الظهر يأذن يشدني يقولي يلا يا أخي علشان نصلي طب أنت مالك يا أخي؟ هو أنت تعرف أنا متوضي ولا لأ؟ كنت أقوله لأ مش هاجي وعرفت إن هو منضم للإخوان لما كنا بنعمل مظاهرات في المدارس وأنا كنت في مدرسة الإبراهيمية. 

واختتم: البوليس بيجي يضرب علينا قنابل مسيلة للدموع، لقيت هو بيجيب جردل فيه رمل وبيتسقبل القنابل، طب هو عرف منين ده؟ ده زميلنا في المدرسة يعني مين اللي علمه؟ عرفت إن هو منضم للإخوان، وأنا تكويني من صغري مبحبش الناس دي.