زوجة بمحكمة الأسرة: جوزى طلقنى وراح لمراته التانية عشان بتأكله فراخ وأنا لأ

جوزى اتجوز عليا ست غنية ورمانى فى الآخر علشانها ... بتلك الكلمات روت زوجة لتحيا مصر عن زوجها الذى فضل زوجته الثانية عليها بسبب وجبة " فراخ " وقام بالأنفصال عنها وعدم الإنفاق على أطفالها مما جعلها تعيش حياة مأساوية وتقف أمام قاضى محكمة الأسرة لترفع على زوجها دعوى نفقة . 

جوزى جه قالى أنا هتجوز عليكى 

بدأت الزوجة حديثها لتحيا مصر :" أنا وجوزى متجوزين من 12 سنة وعندنا بنتين جوزى عنده مكتبة بيقف يشتغل فيها ربنا كان بيرزقنا والحمدلله لحد ما فى يوم من سنة أتعرف على زبونة جتله فى مرة وشغالة مدرسة وحبوا بعض هما الأتنين وجه فاتحنى فى الموضوع أنه هيتجوزها عشان ميبقاش ماشى معاها فى الحرام وقالى " وافقى أنتى بس وأنا هعدل ما بينكم ومش هقصر فى حقك ولا فى عيالى أبداً" وأنا علشان بحبه وعندى منه بنات وافقت ورضيت بالأمر الواقع ."

كانت غنية وكلت دماغ جوزى 

وتابعت الزوجة :"  الست اللى جوزى اتجوزها  مستريحة مادياً وأهلها عندهم شقق وعربيات وبتكسب من شغلها فى التدريس كتير وأنا ظروفى على قدى من يوم ما جوزى عرفنى وعشان كنت بحس أوقات كتير بالنقص من ناحيتها وببقى خايفة أن جوزى يحب العيشة معاها أكتر منه لأنها كانت بتعمله وبتجيبله اللى أنا مش قادرة أجيبه وده بالفعل اللى حصل وكانت كل يوم تشترى لجوزى هدايا غالية وهو كمان عشان مترباش على العز ده كله كان مبهور بيها وقالى " أنا عرفت معاها الجواز اللى على حق وحاسس أكنها أول جوازة ليا " كلامه وجعنى لأن الظروف دى مش بإيدى وعمرى ما قصرت معاه فى حاجة عشان فى الآخر بعد 12 سنة بحالهم تيجى واحدة تخطفه ويقول عليها أحسن منى ". 

جوزى بيمشى عيالى بمطواة فى الشارع وبيعلمهم يفتحوا دماغ اللى يزعلهم..مأساة زوجة

"مفجوع ومبيشبعش" .. زوجة فى دعوى خلع : جوزى بياخد الأكل من قدام أخواتى وعيالى بيجوعوا بسببه

طلقنى عشان ياكل فراخ 

وأختتمت الزوجة حديثها :" فى الفترة الأخيرة جوزى بدل ما كان بيجيلى 4 أيام فى الأسبوع عشان أنا أم عياله وبيروحلها هى 3 أيام الوضع أتغير وبقى بيروحلها هى الأسبوع كله ومبيتصلش ولا بيسأل علينا لحد ما جيبت أخرى ومبقيتش عارفة أصرف على عيالى منين وطبيت عليهم فى الشقة اللى عايشين مع بعض فيها وفتحلى الباب ولقيتهم قاعدين بيتغدوا فراخ وطبيخ وسايبنى أنا وعيالى مش لاقيين اللقمة روحت لجوزى بكل حرقة " يا أنا يا الست دى من النهاردة مش هبقى على ذمتك لحظة كمان غير لما تطلقها وترجع لبيتك وعيالك " راح ضحك وبكل سخرية رمى عليا يمين الطلاق وقالى " يعنى تبقى مأكلانى فراخ ومعيشانى كل يوم فى هنا وأرميها كدة بالساهل ؟" سيبته ومشيت ومن وقتها وهو مبيردش علينا ولا بيبعتلنا مصاريف لحد ما أضطريت أرفع عليه دعوى نفقة لولادى ومش مصدقة أن 12 سنة ضاعوا من حياتى عشان وجبة فراخ ".