جوزى بيمشى عيالى بمطواة فى الشارع وبيعلمهم يفتحوا دماغ اللى يزعلهم..مأساة زوجة

جوزى سواق توك توك وبيربى عيالى على الغلط ..بتلك الكلمات روت زوجة لتحيا مصر من داخل محكمة الأسرة عن زوجها الذى يربى أطفاله على الوحشية فى التعامل معتقداً أنه هكذا يعلمهم كيف يجلبون حقهم من الآخرين ويكونوا ذو شخصية قوية . 

جوزى راجل همجى 

بدأت الزوجة حديثها لتحيا مصر :" أنا وجوزى متجوزين من 15 سنة جوزى سواق توك توك وأنا أكبر منه فى السن بس أتجوزته عشان مكنش قدامى راجل غيره شارينى وكنت بدأت أحس أن قطر الجواز هيفوتنى وخلفت منه 3 ولاد أكبر واحد فيهم عنده 13 سنة جوزى طيب وحنين بس همجى فى التعامل ودايماً بياخد حقه بالدراع وده خلاه يتمسك فى القسم أكتر من مرة بس اللى بيعمله فى الناس وياريت كان بيتأدب بالعكس كان بيزيد فى عنفه أكتر وأكتر ومهما أتكلم معاه مبيقوليش غير " الدنيا عايزة القوى مش عايزة الضعيف ". 

ممسك عيالى مطاوى وبيرفعوها عليا 

وتابعت الزوجة حديثها :" جوزى لما عيالى كبروا ودخلوا المدارس أشترى لكل واحد فيهم مطواة وحطها فى جيوبهم وبقى بيعلمهم أن اللى يزعلهم أو يقولهم كلمة متعجبهمش يفتحوله دماغه بالمطواة وبدل ما يعلمهم يرجعوا من المرسة يذاكروا كان بياخدهم معاه الشارع ويعلمهم السواقة على التوك توك وخناقات الشوارع وأزاى يعاكسوا بنت ويثبتوها عشان ياخدوا كل اللى معاها عيالى مستواهم فى المدرسة أتدمر وأنا نفسى أمهم مبقيتش عارفة أزاى أتعامل معاهم بسبب انى كل ما أزعقلهم وأطلب منهم يذاكروا ويبطلوا تضييع وقت الاقيهم رفعوا عليا المطواة عشان يسكتونى بيها  ولما أشتكيهم لأبوهم يشجعهم ويقولهم " صح كدة يا رجالة تربيتى طمرت فيكم بس بلاش أمكم عشان غلبانة " فى اللحظة دى كنت مش مستوعبة الحال اللى عيالى وصلوله بسبب أبوهم وهما فى سن مش عارفين حتى يميزوا فيه الصح من الغلط ". 

إبنى فتح دماغ صاحبه بسبب سندوتش كبدة 

واختتمت الزوجة  حديثها :" فى الفترة الأخيرة كنت قاعدة فى البيت ولقيت إبنى الكبير بيتصل بأبوه عشان يروحله القسم ولما أبوه راح عرفنا أنه كان بياكل هو وصاحبه فى مطعم تحت البيت وأتخانقوا على سندوتش كبدة ومل واحد مصمم أن السندوتش ده بتاعه والخناقة بينهم كبرت لحد ما إبنى فتح المطواه وعور صاحبه فى دماغه والولد جرى على أهله ولحقوه عند الدكتور وخدوا إبنى من تحت البيت ودوه على القسم ومن وقتها وأنا قررت أنفصل عن جوزى وطلبت منه الطلاق وبالفعل طلقنى لكن مرضيش يدينى العيال وعشان كدة رفعت عليه فى محكمة الاسرة دعوى ضم صغار ده راجل مش أمين على عياله وأنا واثقة فى القانون أنه هيردلى ولادى من تانى عشان أربيهم بمعرفتى أنهم يكونوا ناجحين فى حياتهم ومش بتوع مشاكل وده مش هيتم غير لما يبعدوا عن أبوهم تماماً ".