أمنية تطلب بالخلع: جوزى بيتمر على إعاقة إبنى طول الوقت وسببله مرض نفسى

بعالج إبنى عند طبيب نفسى بسبب كلام أبوه ... بتلك الكلمات روت زوجة لتحيا مصر من داخل محمة الأسرة عن زوجها الذى يكثر من التنمر على طفلها بسبب الإعاقة التى ولد بها فى عيناه مما سبب للطفل حالة نفسى جعلته يحتاج لطبيب نفسى يقوم بعلاجه . 

إبنى أتولد بإعاقة فى عنيه

بدأت الزوجة حديثها لتحيا : أنا وجوزى متجوزين من 10 سنين وعندنا طفل يوم ولادة إبنى أكتشفنا أنه عنده إعاقة في عينه مخلياه بيشوف بعين واحدة والعين التانية لا والدكاترة قالولنا أنه هيفضل عايش كدة طول عمره وملهوش علاج ولما إبنى كبر الناس كلها بدأت تتنمر عليه سواء زمايله فى المدرسة أو أهل جوزى أو حتى الأطفال اللى فى الشارع ده غير أن هو نفسه بيشوف بصعوبة بسببها وده كان دايماً مأثر على مستواه الدراسى فى المدرسة لكن أنا زى أى أم كنت بزرع جواه أنه يتقبل شكله ويحب نفسه وميسمحش لحد يأثر عليه وأوقات كمان كنت بضطر أعلمه أن شخصيته تبقى قوية ويرد على الناس اللى بتجرحه وميسكتلهمش لكن هو كانت خلاص ثقته فى نفسه إنعدمت ولما حد كان بيتريق عليه كان بيسكت ومبيعرف يتكلم".

جوزى بيتنمر على إبنه طول الوقت 

وتابعت الزوجة :" جوزى كنت فكراه هيبقى حنين على إبنه وميحسسوش بالإعاقة اللى عنده لكن اللى حصل عكس كدة تماماً وجوزى بقى أكتر حد بيتريق على إبنى ويضحك عليه كل لما يشوفه ومش بيقوله غير " يا أعمى يا أبو عين واحدة " جوزى راجل تافه وسطحى وبياخد كل حاجة هزار من غير ما يفكر فى مشاعر اللى قصاده لكن آخر حاجة كنت أتصورها أنه يعمل كدة كمان فى نفسية إبنه ولما الولد كان يتجرح من كلام أبوه كان بيسكت و ييجى يشتكيلى أنا ويفضل يبكى بحرقة وده كان مدخلنى فى مشاكل كتير مع جوزى كانت بتوصل كذا مرة للطلاق بسبب أنه مش معترف أنه بيعمل حاجة غلط ". 

إبنى جاتله حالة نفسية وبيتعالج عند دكتور

وأختتمت الزوجة حديثها :" إبنى فى الفترة الأخيرة مبقاش يروح المدرسة ولا بيذاكر ولو راح بيفضل يتخانق مع زمايله ويضربهم من غير سبب لدرجة أن المدرسين أشتكولى منه وبعتولى معاه إستدعاء ولى أمر أكتر من مرة ده غير أنه بطل يتكلم زى الأول وبقى على طول ساكت ومش بيبص لحد وبيطلع غله في الأكل لدرجة أن وزنه زاد بشكل غريب  وبيتحرك بصعوبة وطبعاً ده زود تنمر أبوه عليه أكتر وأكتر لحد ما جيبتله دكتور نفسى لحد البيت وأتكفلت أنا بكل مصاريفه عشان لما طلبت من أبوه يصرف هو قالى ده دلع عيال وأنتى مكبرة الموضوع أنا حاسة أنى عايشة مع راجل من غير قلب ولا مشاعر ونفسية أبنى ضاعت بسببه ومش هستنى لحد ما إبنى يعمل حاجة فى نفسه فى يوم من الأيام وعشان كدة قررت أنفصل عنه وسيبتله البيت ورفعت عليه دعوى خلع في المحكمة عشان أخلص منه وأرحم إبنى من شره ".