"جوزى حطلى منوم فى الأكل وأعتدى عليا هو وصاحبه" ..مأساة زوجة من داخل محكمة الأسرة

“ صاحب جوزى قاله أنا معجب بمراتك راحوا حطولى منوم وعملوا معايا علاقة هما الأتنين” .. بتلك الكلمات روت زوجة لتحيا مصر من داخل محكمة الأسرة عن زوجها وصديقه اللذان تعدوا عليها جنسياً بدون وعيها ليشبعوا شهوتهم الدنيئة . 

تحيا مصر

جوزى بيعمل كل حاجة حرام

بدأت الزوجة حديثها لتحيا مصر :" أنا وجوزى متجوزين من 6 سنين وعندنا طفل عنده 5 سنين جوزى أنا وهو دخلنا في قصة حب وأنا لسة في مرحلة الثانوية فى المدرسة وهو يبقى أكبر منى بـ10 سنين كنت صغيرة وقتها وصدقت كل كلامه وكنت بحاول أغيره للأحسن عشان لما اعيش معاه فى بيت واحد ويبقى أب لولادى هو كان بيعمل حاجات كتير حرام ومترضيش ربنا كان بيشرب مخدرات وكان بيكلم بنات ومتصاحب على شلة شباب مش كويسة وكانوا دايماً بيشجعوه على الغلط ده غير أهله اللى كانوا دايماً غضبانين عليه لكن أنا عشان كنت بحبه كنت راضية بحاله المهم نكون سوا وميتجوزش واحدة غيرى لكن بعد الجواز أكتشفت أنى كنت مغفلة لما لقيت جوزى بيتغير للأوحش ومتغيرش للأحسن زى ما كان مواعدنى ".

صاحب جوزى كان معجب بيا وبييجى عندنا كتير 

وتابعت الزوجة :" جوزى شغال ديلفرى في مطعم و من سنة أتعرف على واحد معاه فى الشغل وعرفنى عليه لما كان بيجيبه عندنا البيت يتغدا ويقعدوا يشربوا حشيش مع بعض كنت أنا فى الوقت ده بحضرلهم الأكل وأدخل أوضتى أقعد مع أبنى عشان أبويا كان دايماً مربينى أن لما يبقى فى راجل غريب فى البيت مبنقعدش معاه واللى بيقعد معاه هو راجل البيت بس وخصوصاً أنى كنت بلاحظ نظرات غريبة ومش كويسة من صاحب جوزى على جسمى ولما كنت بطلب من جوزى أنه ميجيبش صاحبه ده عندنا تانى كان بيرد عليا ويقولى " لو مش عاجبك روحى أنتى أقعدى عند أمك " من هنا حسيت أن عايشة مع واحد خسارة يتقال عليه كلمة".

حطولى منوم فى الأكل وأعتدوا عليا 

وأستكملت الزوجة حديثها :" فضلت مدة طويلة بروح عند والدتى لما صاحب جوزى بييجى عندنا لحد ما بدأ ييجى الساعة 3 و 4 الفجر بعد ما بيخلصوا شغل وطبعاً فى وقت زى ده بكون نايمة فى البيت أنا وأبنى لحد ما جه اليوم اللى خربلى حياتى ودمرنى كنت سهرانة مرة ومستنية جوزى يرجع نتعشا سوا ولما رجع لقيته جايب أكل من برة وصاحبه معاه وقالى أقعدى كلى معانا وبعدين أبقى نامى لكن أنا رفضت وقولتله خلاص هاكل أكل تانى وأقعدوا أنتوا مع بعض لقيته مصمم بشكل مش طبيعي أنى أقعد معاهم وأكل من نفس الأكل وبالفعل ده حصل ولبست عباية تدراى جسمى وكلت معاهم وبعد ما خلصت حسيت أنى مش مركزة وعايزة أنام ومش قادرة أصلب طولى فدخلت السرير أنام وسيبتهم برة ".

عرفت من أبنى كل اللى حصل 

واختتمت حديثها :" صحيت الصبح لقيت نفسى من غير هدوم ولقيتهم هما الأتنين مش موجودين و أبنى بيقولى أنه شاف أبوه وصاحبه بيخلعوا هدومهم وبيعملوا معايا حاجات غريبة وأنا نايمة ولحظتها الشكوك دخلت جوايا وأتصلت بجوزى فوراً وقولتله ييجى البيت حالاً ولما رجع كالعادة كان شارب زي كل يوم و قولتله " أية اللي أبنك بيقولوا ده ؟ أنتوا عملتوا فيا أية أنت وصاحبك بليل ؟ " لقيته بيرد عليا بكل برود وقالى " أحنا كنا شاربين وعازين واحدة معانا وكنت أنتى بس اللى قدامنا و كنت عارف أنك هترفضى فأضطريت أحطلك منوم عشان متحسيش بحاجة ونعمل اللى أحنا عايزينه معاكى " محستش بنفسى غير وأنا بمسك تمثال عندى فى الشقة وضربت بيه جوزى على دماغه لحد ما أتعور وهو كان بيحشونى سيبتله البيت وخدت أبنى وهدومى وروحت المحكمة عشان ارفع عليه دعوى طلاق للضرر ويجيلي حقى منه أنا حياتى أتدمرت بقيت حاسة أنى عايشة من غير روح ومبقولش غير حسبى الله ونعم الوكيل في الشيطان اللى كنت عايشة معاه ".