عمرو وهبة: وفر شوية من رفاهياتك عشان غيرك يعرف يجيب أساسياته

تحدث الفنان عمرو وهبة عن أهمية ترك الرفاهيات وإستغلالها في توفير أساسيات المحتاجين لها، وذلك خلال منشور عبر حسابه الرسمي بموقع التواصل الإجتماعي فيسبوك.

تحيا مصر يرصد تفاصيل أخر منشورات عمرو وهبة 

عمرو وهبة عبر فيسبوك

وكتب عمرو وهبة: بوست جد على غير العادة.. بصرف النظر عن الكومنتات اللى هتقول ياعم انت فنان وانت بتاخد ملايين وانت مالك بالكلام ده وكل الحاجات اللى مش صح دى بس هقول برده.

وتابع: مؤخراً بسبب ظروف معظم الناس بمختلف طباقتهم واحتياجتهم وانا منهم بدأ كل واحد فينا يفكر ازاى يوفر وازاى يستغنى عن المصاريف اللى ممكن يستغنى عنها بس انا اكتشفت ان انا الشيطان بقى بيخلينى استنصح مش أوفر.. يعنى بصرف عادى مصاريفى اليوميه اللى مش كلها الصراحه اساسيه او ليها بديل بس بوفر فى الخمسه جنيه اللى بدفعها للى بيحطلى بنزين او بقلل التيبس اللى بسيبه فى مطعم كلت فيه برقم مش شويه والخ من نوعيه المصاريف دى.

عمرو وهبة: بكره السنتحة والفلوس الأتاوة

وأضاف عمرو وهبة: ومع انى بكره السنتحه والفلوس الاتاوه اللى ملهاش لزمه دى وبتعصب من اللى بيرمى نفسه على بريريز العربيه عشان يليطها بفوطته اللى مداقتش طعم الميه فى حياتها وبقول دول ناس مش بيعملو حاجه وبيقرطسونا بس لما فكرت “ووارد جداً اكون بفكر غلط” قولت ياعم سيبهم يقرطسوك بمزاجك وخد انت الثواب يعنى، وهو ممكن يكون بالنسبالك بيستليح بس فى الاخر الاكيد ان هو محتاج الفلوس دى.

وأستكمل وهبة حديثه: ولما بسمع حد بيقولى ياعم الناس دى بيعملو فلوس قد كده بسخن ومش بديهم وبعدين بفكر كده بيعملو كام يعنى؟ الفين جنيه فى الشهر تلات الف خمس تلاف عشر تلاف! حتى اكتر من كده؟ ماهو مش بياخدهم منك ويطلع يعمل كايت سيرفينج فى راس سدر ماهو هيجيب بيهم اكل وشرب و برده مهما زاد ده بقى رقم عادى والقرشين اللى هتدفعهم دول اكيد مش هيفرقو معاك بس وارد يفرقو معاه او مع اللى بيصرف عليهم.

عمرو وهبة: وفر شويه من رفاهياتك عشان غيرك يعرف يجيب شويه من اساسياتة

واختتم: حد هيقولى طبعًا خلاص ياسيدى انت كده بتشجع على الاستلاياح وروح ادفعهم لمستشفى ولا لدار ولا لاى حد مريض او اى حاجه كده هقوله معاك بس انا كـ عمرو ومش بقول انه اى حد يعمل كده انا بقيت يومياً بصحى الصبح افتح ابلكيشن فورى اختار اى جهه تبرعات واحط اى رقم اتبرع بيه حتى لو عشره ولا عشرين جنيه وثبتها كا شئ اساسى فى بدايه يومى لحد ماخلاص بقت حاجه مش بنساها الحمدلله خالص وعامه يعنى انا نصحت بيها كام حد حواليا وكلمهم كلمونى وقالولى دى سحر والله احنا عملنا كده وربنا فتحلنا فى كذا وكذا.. مش شرط طبعًا يحصلك زيهم بس وارد جداً ربنا بسببها يمنع عنك حاجه وحشه كانت هتحصل وانت متعرفش، الخلاصة وفر شويه من رفاهياتك عشان غيرك يعرف يجيب شويه من اساسياتة وشكراً.