«اشتغلت سواقة عشان اساعاد جوزي وفي الآخر طلقني».. مأساة زوجة

فكرت أساعد جوزي وأشتغل علي عربية والدي ومكنتش اعرف أني كدة بخرب بيتي ... بتلك الكلمات روت زوجة لتحيا مصر من داخل محكمة الأسرة عن زوجها الذي أنفصل عنها بعد علمه بطبيعة عملها التي بدأت فيه لتحسين الدخل ومساعدته في المصاريف المعيشية ولكن الزوج أتخذ معها رد فعل سلبية عكس توقعها ورحلت لمحكمة الأسرة لتطالبه بالنفقة لأطفالها بعد الأنفصال . 

عندنا 5 عيال وجوزي وضعه المادي بسيط 

بدأت الزوجة حديثها لتحيا مصر: "أنا وجوزي متجوزين من 26 سنة وعندنا 5 عيال جوزي شغال مكوجي والوضع معانا بسيط وأحياناً كمان اللقمة مش بتكفينا لكن هو راجل طيب وغيور عليا وعارف يحميني ويحمي ولاده طلبت منه كتير أشتغل لكن مبيرضاش وبيقولي "مقدرش ابهدلك في الشوارع ووسط الرجالة كل يوم كفاية عليكي تعب ومجهود البيت والعيال". 

أبويا عنده عربية ومش بيحتاجها فخدتها منه

وتابعت الزوجة الحديث: "في آخر سنتين جواز ولما عيالي كبروا مصاريفهم زادت ومبقيناش ملاحقين عليهم فجتلي فكرة تسهل علينا الوضع وهي أني أخد عربية والدي لأنه خلاص مبقاش يستخدمها بعد ما طلع علي المعاش وأنا معنديش أخوات تانيين فطلبتها منه وهو وافق لكن معرفتوش ولا عرفت حد أني هاخدها أشتغل عليها لأني بعرف اسوق كويس وكان ليا ناس صحابي علموني زمان أيام الجامعة". 

جوزي عرف شغلي من واحد صاحبه راح طلقني 

واختتمت الزوجة حديثها: "فضلت سنتين شغالة علي العربية دي في النهار لما جوزي وعيالي بيبقوا في الشغل والمدرسة وكان أغلب اللي بيركب معايا رجالة لكن عمري ما سمحت لحد يتخطي حدوده معايا لحد ما في مرة يشاء القدر ويركب معايا واحد صاحب جوزي من زمان ولما شافني اتحرج ومفتحش بوقه معايا بكلمة وأنا كمان لكن أول ما شاف جوزي حكاله كل حاجة وكان يوم من أصعب أيام حياتي لأن جوزي يومها نزل فيا ضرب ومرحمنيش ورمي عليا كمان يمين الطلاق وهو بيقولي "بقي أنا أفضل 16 سنة حاميكي من الناس والبهدلة وتروحي في الآخر تشتغلي سواقة وتركبي معاكي رجالة ؟" اتقهرت من كلامه لأنه ظلمني ومفهمش أني عملت كدة عشانه وعشان اساعده ودلوقتي سابلي البيت أنا وعيالي لكن مبيصرفش علينا جنية وده اللي خلاني اطالبه بالنفقة في محكمة الأسرة لأن مبقاش جايلي عين أشتغل تاني نفس الشغل اللي خربلي بيتي ودمرلي حياتي".