«خطيبة جوزي بتهددني تنهي حياتها لو مطلبتش منه الطلاق وهو بيقولي دي مجنونة»..مأساة زوجة

جوزي سابني ونسي عشرتي عشان خاطر خطيبته الجديدة ... بتلك الكلمات روت زوجة لتحيا مصر من داخل محكمة الأسرة عن زوجها الذي قام بخطبة فتاة أخرى واكتشفت الزوجة ذلك من خلال مكالمة هاتفية اجرتها تلك الفتاة للزوجة لتخبرها بعلاقتها مع زوجها لتنهار الزوجة بعد تلك المكالمة ويصل بهما الأمر للأنفصال ورفع دعوى نفقة من الزوجة تطالب فيها زوجها بتسديد نفقات أطفالها . 

جوزي عاش وسط عيلة رجالتها بيتجوزوا كتير 

بدأت الزوجة حديثها لتحيا مصر :" أنا وجوزي متجوزين من 8 سنين وعندنا طفلين جوزي من الرجالة الملتزمة دينياً ومرتاحة ماديأ وعاش وسط عيلة كل رجالتها بيتجوزوا مرة وأتنين وتلاتة لكنه لما اتجوزني كل اللي قالهولي " أنتي لو ريحتيني في العيشة معاكي وخليتيني مش محتاج حاجة عمري ما هفكر اتجوز عليكي " وأنا علي الأساس ده اتطمنت في حياتي معاه لأني عارفة نفسي وعارفة أني بحبه وعمري ما هقصر معاه ". 

كلمتني واحدة وقالتلي أنا خطيبة جوزك 

وتابعت الزوجة الحديث :" في آخر سنة جواز ليا مع جوزي كانت الحياة بيننا مستقرة جداً لحد ما جاتلي في مرة مكالمة من بنت وبتسألني " أنتي تبقي مراة عبدالله ؟" ولما جاوبتها وقولتلها " اه وحضرتك تبقي مين ؟" قالتلي " أنا خطيبة جوزك ومش عايزاكي تتصدمي كدة كدة مسيرك كنتي تعرفي عشان بصراحة أنا وهو حبينا بعض وقررنا نكمل علاقتنا بالحلال ونتجوز "داريت الصدمة في قلبي وسألتها " واية المطلوب مني دلوقتي ؟" راحت قالتلي " أنا حياتي واقفة بسببك وبفكر في الأنتحار لأنه علقني بيه وكل شوية احسه متردد وعايز يسيبني عشان خايف أنك تعرفي وتسيبيه وتحرميه من ولاده وعشان كدة بكلمك وبعرفك أنك لو مبعدتيش عنه بالأصول وبالود هموت نفسي وذنبي هيفضل في رقبتك لأني مش متخيلة حياتي لحظة من غيره ". 

طلبت من جوزي الطلاق وأنا مكسورة 

واختتمت الزوجة حديثها :" قفلت معاها المكالمة وجوزي وقتها كان في الشغل ورجع بعد ساعة وشافني وأنا في الحالة دى ومتمسرة مكاني واجهته في لحظتها وسألته " طالما أنت حبيت وخطبت واحدة غيري مطلقتنيش لية ؟ خونتني لية وأنا عمري ما قصرت معاك في حاجة ؟" راح سألني " أنتي جيبتي الكلام ده منين ؟" وقولتله " حبيبتك هي اللي كلمتني وقالتلي بنفسها " قالي " أنا مش هنكر أن اللي هي قالتهولك حقيقة بس أنا عمري ما اخسرك واخسر ولادي عشانها دي مجنونة وكل يوم بتهددني بحاجة شكل وتأذى نفسها عشان مسيبهاش فبلاش تعملي عقلك بعقلها واوعدك أني هفضل معاكي اراعيكي واراعي ولادنا وجوازي ده عمره ما هيقصر في علاقتنا بحاجة " فضلت افكر أيام في أني اكمل مع جوزي ولا مكملش لكن مشاعري اجبرتني أني اطلب منه الطلاق وابعد عنه لأني مش هستحمل بعد السنين ده كلها واحدة تشاركني فيه ده غير أنها ممكن تكون مريضة فعلاً وتعمل حاجة في نفسها وهو في البداية مرضيش يطلقني لكن لما لقاني مصممة خدها معايا عند وطلقني فعلاً ومش بيبعت لولاده جنية واحد وده اللي جابني محكمة الأسرة انهاردة عشان ارفع عليه دعوي نفقة يمكن يحن علي ولاده هو فاكرني طلبت الطلاق عشان مش عايزاه لكن اللي ميعرفهوش أني كان لازم اتطلق منه عشان بحبه وغيرانة عليه من اي واحدة حتي لو حلاله ".