على طريقة ياسمين عز.. نهال عنبر: الست أحلى حاجة فيها نعوميتها ولازم تحسسي الراجل بالأمومة

خرجت الفنانة نهال عنبر في لايف جديد عبر حسابها الرسمي بموقع التواصل الإجتماعي “فيسبوك”، لتتحدث عن سبب زيادة نسب الطلاق في مصر، مشيرة إلى أن علاقة الرجل والمرأة يجب أن تظل بينهم وتبنى على الحب والإحترام والمودة.

تحيا مصر يرصد في ذلك التقرير أبرز تصريحات نهال عنبر في لايف عبر موقع فيسبوك

نهال عنبر: الجواز رزق حلو ولازم نستمتع بيه زي ما هو

وقالت نهال عنبر: الجواز رزق وزرق حلو ولازم نستمتع بيه زي ما هو، عايزين ندخل الحياة واحنا فاتحين قلبنا لبعض، احنا لا زنانين ولا وغيورين ولا بنكد على اللي قدمنا عشان عمل حاجة معجبتناش، وطبيعي يكون في حاجات مبنحبهاش في الراجل والعكس، بالحب تاخدي عنيه.

نهال عنبر: الست أحلى حاجة فيها نعومتها وإنها تبقى حنينة.. خليكي أم لزوجك

وتابعت نهال عنبر حديثها: الست أحلى حاجة فيها نعومتها وإنها تبقى حنينة.. هو مشي من عند مامته جه عند مامته التانية اللي هي انت، والراجل بيتعلق بمامته جدا فلما يلاقي أم تانية في البيت محتضناه وبتطبطب عليه عمره ما هيسيبه.

وأضافت: بلاش تطسي المشكلة في وش جوزك وهو داخل البيت، يدخل من شغله تغديه وبعدها تشربوا الشاي ويريح شوية وبعد كدة نقعد نحكي مع بعض ونتكلم، ولو الراجل داخل الشغل مش طايق نفسه اقلع جاكت الشغل برة.

واختتمت نهال عنبر حديثها: ليه أسراركم تبقى في الشارع، زعلانين اهدوا وبعد كدة اتكلموا محدش ياخد قرار ساعة عصبية، الطلاق مش سهل دا خراب بيت وشحططة عيال.. والست ذكية وممكن تسحب جوزها لحضنها بسهولة، الست ذكية ممكن تسحب الزوج لحضنها أما تتكلم معاه بهدوء .

نهال عنبر تستنكر فضائح العلاقات على السوشيال ميديا

وسبق وأن استنكرت نهال عنبر فضائح السوشيال ميديا، فقالت: "فيه ظاهرة غريبة منتشرة وهي نشر الأسرار على العلن.. دي فضايح.. ميصحش لو جوزي مضايقني ولا صاحبتي أطلع اتكلم عليهم على السوشيال ميديا.. الست ستر وغطا على جوزها وأسرار البيت مينفعش تخرج برا عتبته، وأنا لما كنت بختلف مع جوزي عمري ما لجأت لعيلتي، لو فضحنا نفسنا هيكون منظري إيه قدام عيالي؟، لما أفضح حد هستفاد إيه، أو لما أعمل مشاكل بيني وبين حد، ما أقول أنا مالي وخلاص، نفسي نتعامل مع السوشيال ميديا صح مينفعش حياتنا تكون مباحة.. ده حتى ممكن الإنسان يتحسد، داروا على شمعتكم".