عماد رشاد يضع روشتة الزواج الناجح للرجال: قولها حاضر.. ومتقعدهاش من الشغل

حرص الفنان عماد رشاد على مشاركة الرجال المقبلين على الزواج بروشتة الزواج الناجح، بعد زواجه الذي دام لمدة 40 سنة وذلك خلال لقائه ببرنامج واحد من الناس.

تحيا مصر يرصد لكم روشتة الزواج الناجح

عماد رشاد: متعترفش لما تعمل غلطة.. وكبر دماغك

- اوعى لما تعمل غلطة وتعترف عشان الست الشرقية لما تروح تعتذرلها هتقولك حاضر وتطبطب عليك وفي اول موقف هتقولك انت عملت كذا يابن كذا ومش قد انك تعترفلها

- حتى لو المرأة مش عاطفية عاملها برومانسية

- اوعى تخلي البنت تقعد في البيت عشان ده هيفيده انها مش هتبقى فضياله وميبقاش تسليتها

- الزوج يقول حاضر وماشي ولو قالت حط المخدة دي هنا قولها حاضر ولما تمشي شيلها تاني

- كبر دماغك

- حط الست دايمًا قدامك بخطوة عشان تستحق

عماد رشاد وشعوره بالوحدة

وكشف الفنان في نفس اللقاء عن شعوره بالوحدة بعد فقدان أصدقائه، قائلًا: ينقصنا الحب الصادق بين الناس، انا فقدت اصدقائي الخمسة وبشوف اتنين اصدقاء متخاصمين والدنيا متستاهلش وبزعل لما بلاقي قرايب متخانقين والحكاية متساويش، تنازل واتقدم وقرب ومد ايدك ومتضيعوش يوم عشان لما تفقد حد غالي هتكون خسرت كتير. 

وتابع: بقيت وحيد وفي البيت ليا اوضة مبطلعش منها وكل مافقد صديق كنت بفقد جزء مني كل واحد كان بياخد جزء وهو ماشي وفي بواقي مشاعر وذكريات جميلة بس بقت مؤلمة.

عماد رشاد يوجه رسالة لنفسه

ووجه رشاد رسالة لنفسه، قائلًا: اقوله كمل انت لسه عايز تتطمن على ولادك واحفادك وحاول تعيش الدنيا شوية، وليا اصدقاء وهطلب من نفسي ازود علاقتي بيهم لإن قفلتي هي اللي تعباني اكتر والناس اللي حواليا استمتع بيهم.

عماد رشاد: انا عاطفي وبقول لمراتي حاضر

وقال عماد رشاد خلال نفس اللقاء: انا عاطفي وبعمل اكل لمراتي وشموع ومزيكا وبشبع أحاسيسي وبشد اللي معايا عشان يعيش ده معايا، وانا مريح جدًا وبريح مراتي.. اعمل اللي انت عايزة بس قولها حاضر.

وتابع: الزوج يقول حاضر وماشي لو قالت حط المخدة دي هناك حطها وبعد ما تمشي شيلها تاني وكبر دماغك، والحاجات الضخمة.

عماد رشاد واعترافه بالحب لزوجته 

وعن تفاصيل اعترافه بالحب لزوجته قال: كلمة بحبك انا كتبتها قدام المعهد على كياس الرمل، راحت هي كتبالي عليها هي كمان.

أما عن أكثر الأدوار الرومانسية التي يفضلها، قال: ملاقيتش الدور اللي يبقى قد مشاعري، التعامل مع الست هي دايمًا قدامي بخطوة.. صحبات بنتي بديلهم الاحترام، ودايمًا قدامك بخطوة قدامك عشان تستحق وبعامل الست كإنها شئ ربنا كرمنا بيه.