«مراتي بتشرب حشيش قبل النوم وبتقولي بيعدلي مزاجي عشان اعرف استحملك».. مأساة زوج

صحابي كانوا بيجاملوني بحتة حشيش وألاقي مراتي في الآخر شربته كله.. بتلك الكلمات روى زوج لتحيا مصر من داخل محكمة الأسرة عن زوجته ضعيفة الشخصية والتي لا تعرف كيف تواجه صعوبات الحياة إلا بسلوكيات خاطئة تساعدها على الهروب من الواقع حتي وصل بها الأمر إلي إدمان مخدر الحشيش مبررة ذلك الفعل الشنيع أنه له القدرة على جعل الشخص الذي يقوم بتعاطيه أن يكون في حالة مزاج معتدل أعصاب مرتخية.

مراتي شخصيتها ضعيفة ومبتعرفش تواجه مشاكلنا 

بدأ الزوج حديثه لـ تحيا مصر :" أنا ومراتي متجوزين من 15 سنة وعندنا 4 أطفال كنا متجوزين عن حب في أيام الكلية لكن مشاكلنا كانت كتير ومبتخلصش وهي من يوم ما عرفتها وهي من النوع اللي مش بيعرف يواجه المشاكل ويتصرف فيها ويدورلها على حلول بالعكس كنا كل ما تواجهنا مشكلة كانت تلجأ للهروب والاختفاء زي مثلاً لما كنت أتخانق معاها على حاجة هي بتعملها غلط كان تفضل بالأيام مش بتكلمني عشان تريح دماغها ولو كنا اتعرضنا لمشكلة أو أزمة مادية كانت تفضل نايمة بالساعات في البيت ومتصحاش  غير علي صريخ العيال عشان تهرب من ظروف اليوم اللي بنمر بيها وتسيبني أنا اللي أواجه كل حاجة لوحدي بدل ما تساعدني زي ما بقية الستات بتعمل وبتساعد أزواجهم ".

صحابي كانوا بيدوني الحشيش في المناسبات والقعدات الحلوة  

وتابع الزوج :" ليا ناس صحابي بيحبوا يجاملوني لو روحنا فرح يدوني حتة حشيش ولو قعدنا قعدة حلوة علي القهوة برضه بيكون نفس النظام وكنت باخد الحشيش ده وأروح بيه البيت واشربه في حالات معينة زي لو في وقت ضيق أو خنقة ممكن اشربلي منه سيجارتين لأني مليش فيه وبراعي أن ليا عيال وبيت ممكن يتضروا بسببه لكن ندمت على كل لحظة دخلت فيها القرف ده بيتي لما مراتي طلبت مني تجربه مرة معايا وبعدها أدمنته وبقيت بتشربه أكتر مني ".

بتقولي بشربه عشان أعرف استحملك وعشان أظبطلك مزاجك 

واختتم الزوج حديثه :" مراتي من الستات اللي ممكن تشرب سجاير أو شيشة في المناسبات بس لكن لما أنا دخلت الحشيش بيتي وطلبت مني تجربه عجبها وخلصت الكمية اللي كانت معايا كلها ومش بس كده دي كمان بقيت تصرف فلوسنا كلها عليه ولما كنت أتكلم معاها وأفهمها أن ده ميصحش وأنها أم ولازم تراعي وجود أولادها في البيت وأنهم ممكن يتعبوا منه وممكن كمان يشوفوها في مرة وهي بتشربه ويقلدوها لكن هي مكنتش بتدي لكلامي أي إهتمام بل بالعكس كانت بتنفعل عليا وتقولي " أنا بشربه عشان بيعدلي مزاجي وأعرف أستحملك وأستحمل مشاكلك أنت وعيالك والحياة الصعبة اللي إحنا عايشينها وعشان أعرف أظبطلك مزاجك أنت كمان لما نبقي لوحدينا " حاولت فترة كبيرة أفهمها وأوعيها لكن في الآخر تعبت منها ورميت عليها يمين الطلاق وهي رافعة عليا بالمحامي بتاعها دعوى نفقة لعيالها وأنا بالرغم من حبي الشديد لعيالي لكن مضايق أن واحدة زي دي تبقي أمهم ومش هعرف أخلص منها بقية عمري ".