«حمايا شبه الأطفال».. زوج للقاضي: أنا راجل مهندس وبتضرب بالعصاية كل يوم في الشارع

" رجعلي بنتي مش عارف أعيش من غيرها ".. كلمات رددها الزوج و الغضب يملأ ملامح وجهه حيث كان يكررها ليقلد صاحب تلك الكلمات وهو والد زوجته حين كان يقولها له وهو يتعدي عليه بالضرب أمام المارة في الشارع بسبب حب أبنته له ورغبته لرجوعها والعيش معه مثلما كانت قبل الزواج لينتهي بهم المطاف إلي الخلع والوقوف في المحاكم أمام القضاة لتسديد النفقة والمصروفات بعد أن كانت حياتهم يملأها النعيم.

مراتي دايبة فيا من صغرها وأتقدمتلها 7 مرات 

بدأ الزوج حديثه لتحيا مصر :" أنا مهندس مدني و أتعرفت علي مراتي وهي في ثانوي عام عشان كانت صاحبة أختي المقربة أعجبت بيا وأنا كمان أعجبت بيها وطلبت من أختي أنها تعرفنا علي بعض وبالفعل ده حصل وقربنا جدا وفضلت مستنيها 3 سنين لحد ما تخلص مدرسة وأطلب أيديها للجواز وهي في الكلية لكن مجرد ما ده حصل وأنا جهزت نفسي في شغلي وعرفت أهلي اتفاجأت منها أن أبوها رافض يقابلني بسبب أنها بنته الوحيدة وأن كمان مراته متوفية ومش عايزها تبعد عنه بالسرعة دي  وده سببلي أحراج شديد قدام اهلي وبالتالي قالولي " أنت ألف بنت تتمناك ومتجريش ورا حد " لكن أنا من حبي ليها فضلت سنة كاملة ببذل محاولات مع والدها وطلبت أيديها منه 7 مرات وكانوا بينتهوا كلهم بالفرض منه لحد ما وصل الأمر أني كنت بروحله لحد مكان شغله عشان أكلمه في الموضوع وفي النهاية وافق بعد إلحاح شديد وأتجوزنا ".

حمايا كل يوم يضربني بالعصاية ويضحك الناس عليا 

وتابع الزوج :" حمايا بعد ما أنا ومراتي أتجوزنا بقي يتعمد مضايقتي وأنه يخرب علينا حياتنا كان من وقت للتاني يتدعي المرض عشان مراتي تسيب البيت وتروح تقعد معاه وتخدمه وكنت اتفاجئ أنه بيقول عليا للناس أني بعذب بنته ومبصرفش عليها ولا بأكلها وكان يستني أوقات الأعياد والمناسبات وييجي يبات معانا فيها عشان ميخلنيش أعرف أختلي بمراتي كل ده كنت بسكت عليه واستحمله عشان حبي لمراتي اللي حاربت عشانها سنين لكن اللي مقدرتش اتحمله هو إهانة حمايا ليا وجريه ورايا في الشوارع كل يوم لما يشوفني بالعصاية اللي هو ماسكها في أيده عشان يضربني بيها وخصوصا لما عرف أن مراتي حامل وفي كل مرة يضربني فيها كان يقولي " أنت اللي خدت بنتي الوحيدة مني بعد ما كانت مالية عليا حياتي ودلوقتي أنا مش عارف أعيش من غيرها ".

حمايا أشترط علي مراتي تخلعني يأما مش هتشوفه تاني  

وأختتم الزوج :" حمايا في الفترة الأخيرة وخصوصا بعد ما مراتي ولدت وجابت ولد وأهتمامها ببيتها زاد وانشغلت عن أبوها جتله حالة نفسية واكتئاب شديد وبقي بيمتنع عن الأكل بالأيام وينزل في الشوارع  يلف فيها ويفضل قاعد علي الأرض بالساعات وبالتالي مراتي لما لقيت الوضع بالشكل ده سألته أية اللي يرضيه ؟ وإجابته للسؤال ده خربتلي بيتي وضيعت مني أغلي أنسانة علي قلبي لما رد عليها وقالها " تخلعي جوزي وترجعي تعيشي مع أبوكي يأما مش هتشوفيني تاني " وبالتالي مراتي خافت علي أبوها من أنه يعمل حاجة في نفسه وبالفعل راحت للمحكمة عشان ترفع عليا دعوي خلع وجيت أحضرها وأنا مهزوم وحاسس بالكسرة لكن عوضي عند ربنا ".