ممكن أتطلق لو جوزي مبيغسلش سنانه ولو خطيبي اتكرع هسيبه.. أبرز تصريحات أمينة شلباية

حلت خبيرة الإتيكيت أمينة شلباية، ضيفة على برنامج “أنا سعيد”، الذي يقدمه الإعلامي سعيد جميل عبر قناة القاهرة والناس، والتي فجرت خلاله تصريحات جريئة كعادتها حول أداب التعامل والنظافة الشخصية وغيرها، ويرصد تحيا مصر في ذلك التقرير أبرز نصائحها.

تصريحات أمينة شلباية في أنا سعيد

• أنا لو مخطوبة لشخص بيتكرع قدامي ومش بيغسل ايديه  هسيبه ومش هفكر مرتين.
• توقفت عن تقديم البراماج بعد ما أضطريت أمسك كريم متأكدة إنه مسيء للناس وأتكلم عليه كويس وكان ممكن أفقد ثقة الناس بعد العمر ده.
• حلقة الكبسولة الذكية فجرتني، وحسيت إن الفلوس اللي بكسبها حرام وبشارك في تضليل الناس.
• لو جوزي مش بيغسل سنانه ومخلفتش منه همشي، وأصلا مكنتش هتجوزه من البداية لكن لو عندي عيال ومضطرة استمر في الزواج، أنا هغسل له سنانه بنفسي.
• لو عايز تربي دقنك ومكسل تحلقها هذبها، لكن عدم غسل الأسنان غير مقبول.

أمينة شلباية تكشف موقفها من تعرضها للانتقادات

وسبق وأن كشفت أمينة شلباية موقفها من الانتقادات التي تتعرض لها بشكل مستمر، فقالت: مبيزعلونيش خالص ولا بيتهزلي شعرة أبدًا، بالعكس دمهم خفيف جدًا وأنا كمان بتفرج عليهم، وفي فيديوهات كتيرة بتضحكني.. والفكرة إن دي حاجة مش أنا اللي كتباها دي مادة بتدرس وهو ده الإتيكيت، بالعكس فرحت إن أنا أثرت في الناس، سواء الناس اللي قاعدة بتتريق أو الناس اللي عايزة تتعلم، ولما الفيديوهات دي بتتنشر يمكن في ناس مش لاقياني على السوشيال ميديا أو ناس يمكن متعرفنيش أصلًا هتبدأ تتابعني”.

وأضافت معربة عن طريقة تناول بعض الأكلات المصرية، فقالت: ودن القطة اللي بتاكلوا بيها العيش بالملوخية ده تعملوه في بيتكم مش مع ناس، والاكل بالشوكة ممتعه وطعمه بيبقى احلى.

أمينة شلباية وبدايتها على السوشيال ميديا

وتحدثت أمينة شلباية عن بدايتها في تقديم فيديوهات الاتكيت على السوشيال ميديا، فقالت: جاتلي فكرة في رمضان اللي فات إن أبدأ في فيديوهات الاكل على السوشيال ميديا.. ومن اول فيديو عملوا قلق.. ودي مش ترجيحاتي للأمر دا علم وانا اتربيت في البيت إني أكل الرز بالشوكة والسكينة مش بالمعلقة..المعلقة للشربة فقط.