نادية الجندي: بقضي رأس السنة بالروحنيات والدعاء.. وأعمالي كلها هادفة وذات قيمة

تحدثت نادية الجندي عن طقوسها في رأس السنة من كل عام، مشيرة إلى أنها لا تحب الخروجات، بينما تفضل قضاءه في المنزل مع نجلها هشام.

تحيا مصر يرصد في ذلك التقرير طقوس نادية الجندي في قضاء ليلة رأس السنة

نادية الجندي: بقضي رأس السنة مع ابني في البيت

قالت نادية الجندي في مداخلة هاتفية لـ برنامج الستات المذاع على قناة النهار وتقدمه الإعلامية سهير جودة: بحب أقضي رأس السنة في البيت وليا طقوس معينة بعملها كل سنة، بحب أقعد مع ابني في البيت وشوية طقوس بعملها برتاح نفسيا وأنا بعملها ببدأ السنة الجديدة بالروحنيات والدعاء وبحس براحة نفسية مبحبش الزحمة والخروج، وعلمت هشام ابني انه يعمل بردو كدة .

نادية الجندي: بيتعرض عليا أعمال فنية كتير بس مبينفعش أقدم للناس مستوى أقل

وتطرقت نادية الجندي بحديثها عن قلة أعمالها الفنية في تلك الفترة، فقالت: أنا مقلة في أعمالي عشان مش بعمل أي حاجة، أنا عودت الناس إني مش بقدم غير الأعمال الهادفة اللي فيها قيمة انسانية واجتماعية، الأعمال دي مش بتتوجد بسهولة، أنا بيتعرض عليا أعمال كتير أوي سينما وتليفزيون، ووحشني جدا في السينما، بس مينفعش أقدم للناس أقل، فيه ثقة بيني وبين الجمهور مقدرش أخجل جمهوري.

وتابعت: السينما مش في عز مجدها لكن هي هتبتدي ترجع، وده من ايرادات فيلم كيرة والجن اللي ناوية إني اشوفه ان شاءالله.

نادية الجندي: لو ما وقفتش قدام الكاميرا أموت

وأضافت نادية الجندي موضحة مدى حبى للسينما: أنا عملت 5 أعمال درامية كلهم حلوين الحمدلله من أوب مشوار امرأة ومن أطلق الرصاص ونجحت جدا في الدراما نفس مستوى أعمالي في السينما، لكن أنا السينما بتجري في دمي، أنا لو مواقفتش قدام الكاميرا بحس إني هموت، الكاميرا بقت جزء من حياتي لأني من وأنا طفلة في المدرسة وأنا بمثل وانا عندي 16 سنة، لكن كل الأعمال اللي بتتعرض عليا سطحية وأدوار مكررة، أنا عشان أقف قدام الكاميرا لازم أكون مقتنعة وسعيدة بالعمل، واحس إني بقدم شخصية جديدة فيها تحدي.