زوجة داخل المحكمة : حماتي فضحتني عشان عرفت أني كنت بحب واحد قبل ما أتجوز أبنها

" حماتي عرفت أني كنت عايشة قصة حب قبل ما أتجوز أبنها ومن ساعتها وهي فضحاني في كل حتة " بتلك الكلمات روت زوجة لتحيا مصر من داخل محكمة الأسرة عن والدة زوجها التي أكتشفت الماضي الخاص بها ولم تكتم السر بل أستخدمته لخراب بيتها وألحت علي أبنها أن يطلقها خوفا من أن تخونه مع نفس ذلك الشخص في المستقبل .

علاقتي بجوزي كانت الناس كلها بتحلف بيها

بدأت الزوجة حديثها لتحيا مصر :"  أنا وجوزي متجوزين من 3 سنين وعندنا بنتين تؤام متجوزناش عن حب لكن الحب جه بعد الجواز وكانت الناس كلها بتحسدنا علي علاقتنا الهادية والمستقرة و اي اتنين متجوزين كانوا نفسهم يبقوا شبهنا حماتي من أول يوم جواز وهي عاملة نفسها بتحبني عشان أبنها ميزعلش منها أنها واقفة في طريقه فكانت بتمثل أنها بتحبني وبتعتبرني زي بنتها لكن كنت بعرف أنها من ورايا بتدورلي علي اي غلطة عشان تخرب علاقتي بأبنها ومكنتش بتلاقي ".

جارتي من غيرتها قالت سري لحماتي 

وتابعت الزوجة :" حماتي عندها مكنة خياطة في بيتها والستات بتروحلها عشان تخيطلهم لبسهم لو فيه قطع او اي عيوب ويشاء القدر أن تظهر واحدة جارتي وكانت من أقرب صاحباتي ومعاها كل أسراري بس بعدنا عن بعض بسبب غيرتها من جوازي وأنها لسة متجوزتش ومكنش بيتقدملها عرسان وفي مرة راحت لحماتي عشان تخيطلها هدوم ووقتها أتصاحبوا علي بعض وجارتي عشان تخرب عليا حكيتلها أني كنت علي علاقة بشاب لمدة 5 سنين قبل ما أتجوز أبنها ولما أتقدملي أترفض عشان كان وضعه المادي بسيط وحماتي بدل ما تكتم السر عشان أنا بقيت مراة أبنها وأم أحفادها أستخدمته ضدي عشان تعمل اللي كان نفسها تعمله من زمان ".

حماتي فضحتني في كل حتة وخربت بيتي 

وأختتمت الزوجة :" حماتي بعد ما عرفت السر ده عند أول فرصة جمعتني بيها وجوزي كان قاعد معانا فضحتني قدامه وقالت كل حاجة ولما سألتها هي جابت الكلام ده منين قالتلي  " من جارتك اللي كانت أختك وصاحبتك جتلي أخيطلها هدوم وحكيتلي كل حاجة " جوزي كان في ذهول وكل اللي قالهولي " موضوع زي ده نعرفه من الغريب ومش منك أنتي " لكن هي فضلت تشحنه ناحيتي وقالتله " طلقها قبل ما يظهر في حياتها حبيب القلب تاني وتخونك معاه وبيتك يتخرب علي أيديها " وبالفعل جوزي صدق كلامها وطلقني ومبقاش يسأل عليا ولا علي عياله ولا بيصرف عليهم وده اللي خلاني أرفع عليه دعوي نفقة ومش قادرة أقول غير حسبي الله ونعم الوكيل في حماتي اللي خربت بيتي وفضحتني في كل حتة وأنا مكنش ليا ذنب ".