محمود سعد: لو الراجل عايز يطلق يمشي بس يسيب نص فلوسه

كشف الإعلامي محمود سعد من جديد تفاصيل علاقته بوالده، خلال حواره مع الكاتب تامر عبده أمين على تويتر، مطالبًا بإعطاء الرجل نصف ماله لزوجته عندما يقرر تركها.

تحيا مصر يرصد تصريحات محمود سعد. 

محمود سعد ووالده

وقال محمود سعد: اتكلمت عن الحكاية دي مرات ومرات من أيام برنامج البيت بيتك.. وكان هدفي بسيط إن الناس لما تسمع الحكاية دي تاخد بالها ومتتكرش، وبالفعل اتلقيت رسائل من ناس قالولي إنهم مروا بنفس اللي مريت بيه، وأمهات كتير ارتاحوا للتعبير عن مشاكلهم مع أزواجهم، لأن المشكلة دي موجودة في المجتمع بشكل شرس ومش عايزين ده يحصل تاني.

وتابع: الراجل لما يعوز يسيب مراته هو حر ومحدش يقدر يلزمه، ولكن الولاد والقسوة وقلة القيمة والحاجة، بتبقى حاجة صعبة جدًا جدًا، بره فيه قانون لو عايز تطلق امشي بس هات نص فلوسك، احنا عايزين قوانين بالشكل ده، عايزين ننال حظنا من التغيير ده.

وأضاف: مش بقول على أبويا بس.. بقول على حال ناس كتير، الصحافة الصفراء وظفتها بطريقة مش مظبوطة، أنا مكنتش بحبه ولكني كنت بحترمه، مسألة الحب حاجة تانية، أنا مش عايز حاجة منه هو الله يرحمه، وقولتله الكلام ده قبل ما يتوفى، فيه أبهات ممكن يكون معهمش فلوس، ولكن فيه طبطبة واهتمام.

وكان قال محمود سعد: أنا من أسعد الناس إني مشيت من التلفزيون والعودة اللي هيعملوها قريب.. أنا مش هرجع.. هما هياخدوا المادة بتاعة يوتيوب ويعرضوها على قناة النهار.. هيسعدني إن الناس اللي مش بتشوف يوتيوب تتفرج عليا على قناة النهار.

وتابع: مبسمعش نفسي خالص ومبقدرش اسمع صوتي خالص، ولما حصلت كورونا معرفناش ننزل نصور باب الخلق، ومكنش عندي حاجة غير إني أحكي ولقيت استحسان عند البعض.. وبحس إن الحكايات اللي بحكيها بتمس مشاعر ناس كتير بيمروا بنفس الظرف، بيبقى فيها نوع من أنواع الطبطبة على الناس وميحسوش إنهم لوحده وإن اللي بيعمل كده يبطل.. فيها معاني كتير جدًا.

وأضاف: هبة شلبي بتشتغل معايا من سنة 2003 بقالها 20 سنة، فهي فاهمة الشغل كويس.. وهي اللي أصرت عليّا في موضوع اليوتيوب من حوالي 7 سنين ومسمتعش لكلامها غير من حوالي سنتين.. وفي يوم لقيت حوار ينفع ينزل على يوتيوب.. وبعدين هي اللي بقيت تعمل كل حاجة.

واختتم حديثه قائلًا: لم أحلم بمكانتي الحالية.. الحياة مشيت بيا في سكك متعرجة كتير.. خدتني في أماكن مش مخطط لها.. خطط لإثبات وجودي في مهنة اخترتها.. أنا خريج آداب تاريخ واخترت المهنة دي.. والمهمة كانت في غاية الصعوبة.