يسرا: الشهرة دين في رقبتنا ومسئولية

أوضحت الفنانة الكبيرة يسرا أن الشهرة مسئولية كبيرة، يجب الابتعاد عنها، كاشفة عن سبب حبها للفن، وذلك خلال لقائها في برنامج abtalks مع الإعلامي الإماراتي أنس بوخش. 

تحيا مصر يرصد تصريحات يسرا عن الشهرة. 

تصريحات يسرا عن الشهرة

قالت يسرا: لما كنت بروح السينما مع والدتي كنا بنشوف 3 أفلام أساسيين كل ليلة من بلاد مختلفة، ومن هنا حبيت السينما وبقيت مؤمنة بها ولغة الفن دي لمست قلبي، وقولت عايزة أكون على الشاشة دي؛ لأنها اللغة الوحيدة اللي مش محتاجة ترجمة.

وتابعت: لو حد بيسعى للشهرة فقط هيقدر يحققها في ثانية بدون مجهود، ولكنها عمرها ما هتدوم لأنك لازم تشتغل بـ جهد وتحب مهنتك مش الشهرة، ولازم تحترم اللي بتعمله عشان يقدر يمنحك شيء جميل ويترد ليك ولازم تعرف إزاي تستخدم الشهرة في الشيء الصح وأنك تخدم المجتمع مش عشان النجاح ولا الفلوس، ولازم تتجنب الجزء السئ من الشهرة، وفي النهاية مش هنقدر نرضي الجميع والمشكلة أن الجمهور بينسى أننا بشر.

وأضافت: الشهرة دين في رقبتنا ومسئولية كبيرة، فيه ناس قد الشهرة وفيه ناس مش قدها ولما الشهرة بتيجي لهم بيفهموها وفيه ناس لما تجيلهم بتلغبطهم وتجننهم، وأحيانا بكون مُنهكة من الشهرة والناس وبفصل عن العالم تماما، وأقعد في البيت لوحدي وبدخل في حالة خاصة بيا زي القوقعة وبنعزل، ومن هنا بقدر أشحن طاقتي من جديد وأكمل إنما مقدرش أستمر على طول بدون ما أبتعد فترة للاستراحة.

وعن الفرق بين عالم الشهرة في الوطن العربي والشهرة في هوليوود، قالت: العالم في هوليوود أصعب بكتير من عالمنا؛ لأنهم شغالين بسرعة وكأنهم آلة، وبيتسنزفوا من طاقتهم ومش سهل تكون نجم كويس برا، لكن هنا أحنا بيحترمونا ويحبونا والناس بيكبروا معانا، أحنا أرحم كتير.

تحدثت النجمة يسرا عن شعورها عند مقابلة نجم بوليوود شاروخان خلال تكريمها في حفل افتتاح مهرجان البحر الأحمر، وذلك خلال حوارها اليوم ببرنامج “أسرار النجوم” في حلقة خاصة من فعاليات المهرجان.

حيث قالت يسرا: “لما شاروخان جاب سيرتي أنا اتخضيت لأني لم أتوقع ذلك أبدا.. وعلى فكرة أنا أخدت الحضن وقولتله أنا مستنية الحضن لقيته واقف مستنيني وأنا راجعة وروحت حضناه”.

وتابعت: “وأنا وهو اتقابلنا قبل كدا في مهرجانين “مراكش وأبو ظبي” بس من فترة.. وكون أن هو فاكر وعمل ريسرش عني وأكيد صديقي محمد تركي قاله أنا مين بالنسبة للمنطقة العربية فأكيد دا عمل فرق”.

يسرا والعالمية

وفي الحلقة ذاتها، كشفت النجمة يسرا أنها رفضت المشاركة في أفلام عالمية وأن المخرج الراحل يوسف شاهين هو أول شخص يطلعها على العالم الخارجي.

حيث قالت يسرا: “اتعرض عليا في التمانينيات مبلغ مخيف للعمل في السينما العالمية من خلال فيلمين في أمريكا، والاتنين ما عجبونيش، وكمان فيلم فرنساوي برده ما عجبنيش، والنهارده لما بشوف تاريخي الفني أنا ست عالمية والعالم بيعرفني من خلال شغلي في بلدي وبيتي ومكاني”.

وتابعت: “ويوسف شاهين كان أول من عرفني بالعالم الخارجي، وأنا محظوظة بالناس اللي اشتغلت معاهم من عادل إمام ويوسف شاهين”.