حنان: اتعرضت لمشاكل كبيرة بسبب مرات زوجي الأولى وربنا خلق فيا روح تانية

كشفت المطربة المعتزلة حنان عن تفاصيل صادمة في حياتها الشخصية، وصعوبات مرت عليها طوال فترة حياتها، وذلك خلال برنامج “واحد من الناس”، الذي يقدمه الإعلامي عمرو الليثي على قناة الحياة.

تحيا مصر يرصد في ذلك التقرير تصرحات المطربة حنان لـ عمرو الليثي

حنان: حصلتلي أحداث أكبر من حجمي واكتشفت إني ضعيفة بس ربنا بيطبط عليا

قالت المطربة حنان: الكام سنة اللي فاتو كانت الأحداث متلاحقة أكبر من حجمي وقدراتي وولادي مش بيحبوني أضعف أو أعيط لأنهم شايفني أقوى إنسانة في الدنيا لكن الحقيقة إن أنا ضعيفة.

وتابعت: أنا شخصية مسؤولة من صغري وأما أقابل مشكلة بحلها الأول وبعدين أفكر فيها، ومعنديش حد أحمله مسؤولتي، بس بيجي عليك وقت حسيت أنه بجد يارب أنا مش عارفة أعمل ايه ومش عارفة أعمل حاجة، وربنا كان واقف جانبي جدا وكنت حساه بيطبط عليا.

حنان: اتعرضت لمشاكل كبيرة في ألمانيا بسبب مرات زوجي الأولى

وأضافت: بعد وفاة جوزي اتعرضت لمشاكل كبيرة من أصدقائه في ألمانيا عشان عايزني أمشي وده بسبب زوجته الأولى رغم إننا كنا صحاب، وقعدت على الوضع ده 3 سنين، ومستحملتش وسيبت حاجات كتير ورايا ومشيت.

واستكملت: أنا معترفة جدا بالقضاء والقدر وإن ربنا بيدي كل واحد على قدر تحمله، وحنان بتاعة زمان دي حد غيري النهاردة، أنا حتى ناسية أنا ايه، ربنا خلق فيا روح تانية.

حنان: ربيت ولاد جوزي وفرحانة إنهم شايلني في قلبهم

واختتم حنان حديثها: كل خطوة في حياتي كان فيها علم، ولكن هي كانت قدرية وربيت ولاد جوزي أما توفى عشان كان لازم ألحقهم ولو عملت حياتي فيلم هيقولوا ده أونطة من كتر اللي مريت بيه، وبفرح إن الولاد دي شايلني في قلبهم بحب كبير وإني ماما الجميلة اللي شايلة عنهم وبيحكلهم مشاكلهم.

جدير بالذكر، أنه حصلت المطربة حنان على عدد من الجوائز منها  جائزة أفضل مطربة في العالم العربي من فرنسا لهذا النموذج الغنائي المتطور، كما سعت إليها شركة المطرب "مايكل جاكسون".. لتحترف غناء البوب ضمن شركته، وتقيم بصفة نهائية في أمريكا.. ومن قبل ذلك كان مشوارها الفني مع فرقة أم كلثوم وفرقة عمار الشريعي، لكنها اعتزلت في عام 1997 وقررت ارتداء الحجاب.