مفهمني أنه مدير شركة وطلع بيقدم للموظفين المشاريب.. مأساة زوجة مع زوجها

" كان كل يوم بينزل لابس البدلة ومتشيك وطلع في الاخر بيقدم للموظفين شاي وقهوي " بتلك الكلمات روت زوجة لتحيا مصر من داخل محكمة الاسرة عن زوجها الذي أوهمها بأنه مسؤول في شركة عقارات كبيرة وتقدم لخطبتها علي هذا الأساس ولأستعجالها علي الزواج بعد ما تقدم بها العمر ووصلت إلي سن العنوسة وافقت علي الزواج منه وكشفت أمره بعد 60 يوم من الزواج فقط . 

جوزي أتقدملي وأنا عانس وخلال 3 شهور كنا متجوزين 

بدأت الزوجة حديثها لتحيا مصر :" جوزي أتقدملي وأنا 33 سنة وهو 37 سنة وكان قايلي أنه لسة متجوزش عشان لسة ملقاش البنت اللي بيحلم بيها وأنا عشان مريت بنفس الأحساس ده صدقته لأن أنا كمان كنت رافضة الجواز لحد مالاقي الشخص اللي بتمناه وأحس انه هيصونني ويقدرني لكن فضلت كدة سنين كتيرة وكان كل اللي بيتقدمولي ناس متملاش عيني لحد ما فقدت الأمل وأول ما جوزي أتقدملي قولت خلاص بقي أجرب حظي وأوافق لأني لو اتأخرت عن كدة ممكن متجوزش خالص  وبالفعل خلال 3 شهور كنا مخطوبين وكاتبين الكتاب ".

كان قايلي أنه مدير شركة عقارات كبيرة 

وتابعت الزوجة :" جوزي كان مفهمني أنه مدير شركة عقارات لكن مكنش في أي حاجة تدل علي كدة خصوصا انه جابلي شقة متواضعة وشبكة بسيطة لكن اهلي معترضوش لأنهم كان عايزني أتجوز في أسرع وقت عشان كلام الناس ده غير أنه مكنش معاه عربية وحتي لبسه كان عنده بدلتين بس وبيلبس كل واحدة منهم شوية بس قولت عادي يمكن مبيحبش يصرف فلوسه علي اللبس وبيصرفها علي حاجات أهم لكن في قصة العربية اللي مقدرتش مسألوش فيه وخصوصا أني كنت خجولة جدا معاه لأني ملحقتش حتي أعرفه  قولتله " هو أنت مجيبتش عربية لية ؟" قالي " كان معايا عربية كبيرة وموديل حديث بس عملت بيها حادثة قبل ما أعرفك علي طول وعايز أجيب واحدة غيرها " لحد ما بدأت أشك وأستغرب الوضع اللي أنا عايشاه وقولتله " أنا عايزة أجي أشوف شركتك وأتفرج عليها وأظن أنا مراتك ومن حقي أعمل كدة " لقيته أرتبك وقالي " هي بس بنعمل فيها شوية تجديدات وأول ما تخلص هجيبك تشوفيها ".

روحت معاه الشركة ولقيت الناس بيطلبه منه شاي وقهوة 

وأختتمت الزوجة حديثها :" عدا شهر علي وعد جوزي ليا أني هروح أشوف شركته وكنت كل مرة اسأله بيرتبك أكتر ويتهرب مني لحد ما جيت في يوم الصبح وهو نازل قولتله " أنا جاية معاك ولو قولتلي لا يبقي تطلقني وكل واحد يروح لحاله لاني مبقيتش مرتحالك " أتعصب وحاول بكل الطرق يمنعني من النزول لكن أنا أصريت وبالفعل نزلت معاه وروحنا الشركة وأول ما دخلت لقيت الناس كلها أول ما شافوه اللي بيطلب شاي واللي بيطلب قهوة واللي بيطلب عصير وهو كان واقف والأحراج مالي وشه لحد ما روحت لموظفة سألتها " هو فين المدير ؟ " راحت قالتلي " المدير في أجتماع فوق من ساعة " وجوزي كان واقف قدام الموظفة دي وطلبت منه هي كمان كوباية شاي هنا كنت جمعت الحيرة اللي كانت جوايا وبدات أفهم وأدرك وروحت سألت جوزي " أنت ليه خبيت عليا ؟" قالي " كنتي عايزاني أعمل أية وأنا كل ما أتقدم لواحدة تعجبني وبنت ناس وتعرف طبيعة شغلي مترضاش تتجوزني " سيبته ومشيت وسيبتله كمان البيت وروحت رفعت عليه دعوي خلع وحاسة بندم عمري كله وحتي أهلي مش مسامحاهم لأنهم جوزوني لشخص مسألوش عن أصله وفصله لمجرد أني بقيت عانس بس هقول أية ؟ عوضي عند ربنا ".