" مراتي خلت بلطجية يضربوني في مكان شغلي عشان عرفت أني أتجوزت عليها " .. مأساة زوج

" بعتتلي بلطجية عشان تنتقم مني بعد جوازي عليها " بتلك الكلمات روي زوج لتحيا مصر من داخل محكمة الأسرة  عن زوجته التي تزوجها لأرضاء أسرته وبمجرد أن قابل فتاة أحلامه وفتاة أخري لامست قلبه ومشاعره قرر الزواج منها علي زوجته الأولي لتنتقم منه الأخيرة بكل وحشية في مكان عمله .

تحيا مصر 

أتجوزت مراتي عشان أرضي أهلي لكن مكنتش بحبها 

بدأ الزوج حديثه لتحيا مصر :" مراتي تبقي قريبتي من عيلة والدتي وأهلي كانوا بيحبوها عشان هي علي خلق عالي ومتعلمة وأهلها يبقوا قريبين من أهلي وأنا في الوقت ده كنت دخلت سن الـ30 وكنت لسة ملقيتش عروسة مناسبة فأضطريت أوافق علي كلام أهلي أني أروح أتقدم لقريبتي دي ويمكن ييجي الحب بعد الجواز وبالفعل أتقدمتلها وخلال سنة كنا مخطوبين وكاتبين كتابنا بعد الجواز كانت هي اللي بدأت تتعلق بيا جدا وجيبنا ولدين توأم وانا كنت بحاول أحبها وأتعايش معاها علي قد ما أقدر ".

قابلت حب حياتي وفتاة أحلامي بعد الجواز 

وتابع الزوج :" أنا شغال في مكتب عقارات وأتعرفت علي زميلة في شغلي كانت جميلة جدا وروحها حلوة وذكية غصب عني أتشديتلها جدا وبقيت عايز أشوفها وأكلمها طول الوقت لحد ما جه يوم وقررت أرتبط بيها رسمي وهي وافقت رغم أنها كانت عارفة أني متجوز وعندي أولاد لكن هي كمان كانت مشدودالي وأتفقنا أن أهلها بس اللي يبقوا عارفين بالجوازة لكن مراتي وعيالي ميعرفوش حاجة تجنبا للمشاكل وبالفعل أتجوزنا وكنت عايش معاها أجمل أيام حياتي ".

بعتت لي بلطجية يضربوني في مكان شغلي لما عرفت أني أتجوزت 

وأختتم الزوج حديثه :" بعد مرور سنة قدرت فيها أني أعدل بين مراتاتي الأتنين لكن يشاء القدر أن برضه مراتي الأول تعرف رغم كل محاولاتي أني أبعدها عن الموضوع عشان مأذيش مشاعرها كنت في يوم في شغلي وبدون أي مقدمات دخل عليا في المكتب 3 رجالة بلطجية ونزلوا فيا ضرب بالشوم علي دماغي وفي كل جسمي وبعدها سابوني ومشيوا وكنت هفقد الوعي بسببهم ولقيت في نفس اللحظة رسالة من مراتي الأولي كتبالي فيها " العلقة اللي أنت خدتها دي عشان أتجوزت عليا وانا مراتك وأم عيالك اللي مشوفتش منها غير كل خير لا وكمان كنت بتنام معايا علي سرير واحد وأنت مغفلني وعايش قصة حب مع واحدة تانية أنا ماشية وهاخد عيالي معايا وهستني ورقة طلاقي منك وكل حقوقي " وبالفعل طلقتها عشان أسيبها تروح لحالها ومؤخرا عرفت أنها كشفت جوازي بسبب رسايل مراتي التانية علي تليفوني اللي بعتتها وأنا نايم وملحقتش أمسحها وحاليا أنا جاي المحكمة عشان دعوي النفقة اللي هي رفعاها عليا بعد الطلاق أنا عارف أني قصرت في حقها وبدعيلها ربنا يعوضها بشخص أحسن مني لأننا مكناش لبعض من البداية لكن أنا اللي أتسرعت عشان أرضي أهلي ودلوقتي بدفع التمن ".