" مراتي بتخليني أغسلها المواعين وبتقولي أحنا مفيش فرق بيننا " مأساة زوج داخل محكمة الأسرة

" مراتي بتقعد تتكلم مع ستات متجوزة كتير وبيسخنوها عليا " بتلك الكلمات روي زوج لتحيا مصر من داخل محكمة الأسرة عن زوجته التي لم تراعي كينونة زوجها كرجل له واجبات وهي لها واجبات أخري حيث أفرطت في السماع لسيدات أخري متزوجة وأصبحت تسير علي خطاهم في الحياة الزوجية .

تحيا مصر

مراتي كانت ست مطيعة الأول ومفيش زيها 

بدأ الزوج حديثه :" أتجوزت مراتي من 6 سنين وخلفنا ولد وبنت مراتي كانت ست مطيعة جدا في البداية وكان كل اللي يشوفها يحسدني عليها وفي الوقت ده مكنتش بتشتغل وكانت بتقولي أنا عايزة أهتم بيك وبأولادنا ومش عايزة الشغل ياخدني منكم لأنها كانت شغالة مدرسة في حضانة قبل ما أتجوزها وسابتها بعد الجواز عشان تهتم ببيتها وفي بداية الجواز والخلفة مراتي مكنتش بتهتم بالفيس ولا بأي موقع من واقع التواصل الأجتماعي لأن مكنش عندها وقت لده وبعد كدة كل حاجة أتغيرت ".

الستات علي الفيس قلبوها عليا وخلوها واحدة تانية 

وتابع حديثه :" الأمور بيني وبين مراتي كانت ماشية جدا لحد ما ولادنا كبروا وبقوا بينزلوا المدراس ومراتي بقي عندها وقت فراغ خلاها تفتح مواقع التواصل الأجتماعي عشان تسلي نفسها وكانت بتدخل جروبات لستات متجوزة وبيقعدوا كلهم يتكلموا بالساعات وكل واحدة فيهم بتنصح التانية تتعامل أزاي مع جوزها وكان من ضمن اللي بيتقال في الجروبات دي " أن الراجل زي الست وأن مش من المفروض الست هي اللي تشيل كل حاجة زي تربي الأولاد والأهتمام بالبيت وبأحتياجات جوزها وهو يرجع بعد الشغل ينام ويرتاح عادي لو هي كمان نزلت وأشتغلت زيه وكونت صداقات وخبرات وهو يساعدها في شغل البيت عشان ميبقاش الحمل كله عليها لوحدها " .

بقيت بتخليني أغسلها المواعين وتقولي أنا راجعة تعبانة من الشغل 

وأختتم حديثه :" مراتي قلبت عليا 180 درجة وطلبت مني ترجع تنزل تشتغل وأنا عشان مقدر تعبها مع ولادي مرضيتش أرفضلها الطلب ده عشان متفتكرنيش حابسها وبالفعل نزلت وأشتغلت وبقي بييجي أيام ألاقيها سايبالي شغل البيت في أخر اليوم زي المسح وغسيل المواعين وتقولي أعملهم أنت أنا تعبانة اليوم كله في الشغل والمذاكرة للعيال مكنتش بتكلم في الأول وكنت بحاول علي قد ما أقدر أعدي الموضوع عشان أريحها لحد ما جيت في وقت مبقيتش قادر علي ده وأتغيرت أنا كمان معاها لأن طول عمري مبحبش الست اللي بتساوي بين الراجل والست لأن ربنا خلق كل واحد مننا له دور وواجبات معينة خاصة بيه هو واللي صدمني أكتر أنها راحت رفعت عليا دعوي خلع ومبقيتش خلاص محتاجاني في حياتها والشغل قواها عليا وأنا جيت أنهاردة المحكمة عشان أحضر الجلسة وعوضي عند ربنا ".