زوجة داخل محكمة الأسرة : جوزي طلقني وقالي أنا كنت متجوزك عشان أوجع قلب أخويا بيكي ودلوقتي متلزمنيش

" أخو جوزي كان معجب بيا ونفسه يتجوزني ولما أتقدملي أخوه وافقت " بتلك الكلمات روت زوجة داخل محكمة الأسرة عن زوجها الذي كشفت الأيام حقيقته بعد أن أنجبت منه طفل وأعترف لها أن زواجها منه كان لغرض ما وأنتهي .

تحيا مصر

أنا ربنا مديني الشكل جميل وجوزي وأخوه كانوا معجبين بيا

بدأت الزوجة حديثها لتحيا مصر :" الناس كلها من زمان بتقولي أني حلوة وملفتة وبجذب أي حد كان لينا ناس جيراننا في العمارة أتنين أخوات رجالة ووالدتهم وأنا ووالدتي كنا ساكنين قدامهم عشان أنا والدي متوفي الأخ الأكبر فيهم كان معجب بيا وكان بيركز معايا جدا بس كنت نادرا ما بشوفه عشان كان متجوز وقاعد في شقة تاني مع مراته وعياله وأخوه الصغير كان معروف أنه طايش ومتهور وعكس أخوه الكبير تماما الأتنين كانوا معجبين بيا لكن أنا كنت ميالة أكتر للأخ الأكبر لأنه كان راسي ورزين ومرة في مرة جه وأتعرف عليا وأحنا تحت البيت وقالي " خدي رقمي معاكي أنا سألت عنكم وعرفت أنكم ناس طيبين وأن والدك متوفي ورقمي أهو معاكي لو أحتاجتي أي حاجة أنتي أو والدتك ".

جه قالي أنه بيحبني وأخوه الصغير طلبني للجواز  

وتابعت :" ومع الوقت بدأ يبقي فيا بيننا كلام وكان بيحكيلي أن أخوه الصغير كان ملاحظ ده وأنه من طبعه الغيرة عشان محققش أي أنجاز في حياته زيه وبالرغم من أنه كان راجل متجوز إلا أني غصب عني حبيته لأن كان بيخاف علينا جدا وشوفت فيه الأمان لكن لما عدت شهور وأنا علي الوضع ده وهو كان مصارحني أن صعب يبقي فيه بيننا جواز رسمي عشان مراته وعياله فأنا وقتها قررت أقطع معاه أي تواصل لأني مكنتش هقبل أني أبقي بنت وبنوت وأول جوازة ليا تبقي عرفي فبعدت عنه وخرجته من قلبي وبعد شوية وقت لقيت أخوه الصغير بيخبط علينا هو ووالدته وطالبين أيدي للجواز ".

وافقت علي الجوازة عشان أندم أخوه الكبير عليا أني علقني بيه من غير جواز 

وأستكملت :" لما أخوه الصغير أتقدملي وافقت عشان كنت عايزة أحرق قلب أخوه الكبير بأي شكل لأنه علقني بيه من غير جواز رسمي وعشان كنت عايزة أطلعه من قلبي ويبقي ليا بيت وأسرة مستقرة زي ما هو عايش بالظبط أتجوزت أخوه الأصغر من غير حب ولا أي مشاعر ولما أخوه عرف أننا هنتجوز باركلنا وأتغير جدا بعدها ومبقيناش نشوفه غير في المناسبات  حملت من ليلة الدخلة وجيبت طفل وعنده دلوقتي سنة في أول الجواز كانت كل حاجة كويسة لكن مجرد ما دخلنا في المسؤليات بان علي حقيقته اللي صدمتني ".

جوزي جه قالي أنا كنت عايز أحرق قلب أخويا بيكي 

وأختتمت :" جوزي في الفترة اللي عيشتها معاه أكتشفت أنه بيغير من أخوه الكبير جدا اللي كنت بحبه وبيحبني لأنه كان ناجح في شغله وحقق أنجازات كتير وهو مكنش حقق أي حاجة في حياته هو يادوب كان بيشتغل في تصليح التكيفات وأخوه الكبير كان عنده محل ملابس كبير جدا في المنطقة ده غير أنه كان بيحب بنت زمان وهي سابته وحبت أخوه الكبير عشان هو شكله أحلي منه بكتير ومعاه كمان فلوس لحد ما دخلت في قلبه الغيرة والكراهية ناحيته واللي أتضحلي بعد كدة كمان أنه اول ما عرف أن أخوه معجب بيا ومش هيعرف يتجوزني راح طلب أيدي عشان يتجوزني هو وده اللي هو قالهولي يوم ما طلقني لما اتخانقنا علي سبب تافه عشان كنت بطلب مصاريف لأبني راح قالي " أنا كنت متجوزك عشان احرق قلب أخويا بيكي عشان كنت عارف أنه معجب بيكي وحاطط عينه عليكي لكن دلوقتي متلزمنيش ومتخنقنيش معاكي بمصاريفك أنتي وأبنك روحي وأنتي طالق " ندمت ندم عمري أني وافقت علي جوازة مبنية علي الغل والأنتقام ودلوقتي أنا جاية المحكمة عشان أرفع عليه دعوي نفقة لأنه مبقاش يرد علينا وأنا مش عارفة أزاي هصرف علي أبني وهو لسة مشافش دنيا ".