رانيا فريد شوقي: مفيش فنان يصلح أنه يعمل السيرة الذاتية لوالدي ومش هروح أخبط على بيبان المنتجين

حلت الفنانة رانيا فريد شوقي اليوم الأربعاء ضيفة على برنامج الستات الذي تُقدمه الإعلاميتان مفيدة شيحة، سهير جودة، الذي يُعرض عبر قناة النهار، وتحدثت رانيا عن زوجها، كما كشفت عن بعض الأمور الشخصية في حياتها، وتحدثت عن صعوبة تجسيد السيرة الذاتية للفنان فريد شوقي.

تحيا مصر يرصد لكم تصريحات الفنانة رانيا فريد شوقي

ونستعرض لكم أبرز تصريحات الفنانة رانيا فريد شوقي

-أنا خجولة ومش بحب أعمل أدوار جرئية.

-والدي زعل مني بسبب دوري كرقاصة في فيلم مغلف بالشكولاتة.

-أنا مش واخدة فرصتي لأني مش منتجة وفريد شوقي ذكائه إن كان منتج ومؤلف.

-أنا بستنى الأعمال اللي هتجيلي وبختار الأفضل، لو مفيش الأفضل هقعد في بيتنا.

-أنا مقصرة في حق نفسي، بس معنديش جرأة إني اقتحم وأطلب شغل ومش أنا اللي أروح أخبط على بيبان المنتجين.

-زمان كنت عايزة انتشر، لكن دلوقتي عايزة أعمل أعمال كويسة واتبسط بيها

-فاروق الفيشاوي ومحمود عبدالعزيز وأحمد زكي، كانوا دايمًا موجودين في البيت عندنا.

-بيت فريد شوقي كان عبارة عاصمة الفن، وكان ملتقى كل النجوم.

-علاقة فريد شوقي بأحمد زكي كانت علاقة كوميدية.

-مفيش فنان دلوقتي يصلح إنه يعمل السيرة الذاتية للفنان فريد شوقي.

-معظم مسلسلات السير الذاتية فشلت باستثناء بعض الأعمال القليلة.

-مفيش حد جسمانيًا شبه فريد شوقي، بابا كان حجمه مختلف وكان ليه كاريزما وحضور، صعب تلاقيها في حد دلوقتي.

-قابلت زوجي في لقاء صدفة وبعدين مقابلات في تجمع أصدقاء، وبشكر سهير جودة إنها عرفتني عليه.

-أنا وطارق متفقان من أول الجواز إن مفيش طلاق، وأنا اللي اقترحت الفكرة دي، لأن هو بطبعه عاقل وراسي وبيحب شغلي ودي ميزة مش موجود في أي حد.

-بغير على جوزي ولكن هو مش بيديني الفرصة، وأنا اتعلمت من أمي إن مقدرش أحاسبه على حاجة هو معملهاش،وهو محترم جدًا في نفسه.

-نظرية إن الست بتفضل تعافر علشان الحياة تستمر صعبة، والحب أساسي بس ممكن يروح لو إنسان مش كويس مع مراته.

-كلنا بنكبر ومش هنفضل طول الوقت صغيرين، وأنا بعتبر إن حلاوة الروح أهم من الشكل الخارجي.

-مر على زواجي 7 سنوات، ومن الطبيعي أن تكون الحياة بها صعوبات ومميزات ولكن ايد لوحدها متسقفش.

آخر أعمال رانيا فريد شوقي

يذكر أن آخر أعمال الفنانة رانيا فريد شوقي هو مسلسل أبو العروسة، والذي حقق نجاحًا كبيرًا، وهو من بطولة سوسن بدر، سيد رجب، نرمين الفقي، كارولين عزمي، أحمد صيام، محمد عادل، خالد كمال، والعمل من تأليف وإخراج هاني كمال.