مأساة هدير : جوزي بيقولي أنتي بتبيني جسمك للرجالة بفلوس وانا لطشته بالقلم فيها

" جوزي جاب خطيبته القديمة الشقة وقالي دي كانت جاية تعملي صنية بطاطس " بتلك الكلمات روت هدير في بث مباشر لتحيا مصر من داخل محكمة الأسرة عن زوجها متعاطي المخدرات الذي أعتاد علي سبها والتعدي عليها بالضرب لاتفه الأسباب كما قام بخيانتها مع خطيبته السابقة وفي شقتهم الزوجية .

تحيا مصر

جوزي كان بيضربني بعصاية المقشة والخرطوم 

بدأت هدير حديثها لتحيا مصر :" أنا وجوزي متجوزين من 10 سنين وعندي منه 3 أولاد أكبر ولد فيهم عنده 9 سنين والتلاتة بيعانوا من كهرباء زيادة علي المخ وهو ولا مرة فكر يهتم بتعبهم أو يجيبلهم الأدوية اللي بيحتاجوها حتي مصاريف البيت كان بيبخل علينا  فيها ويديني 300 جنية للشهر كله وهو بيقبض من شغله 8الاف جنية في الشهر وكان عايزني كل يوم أعمله فراخ ولحمة ولو الفلوس قصرت معايا ومعملتوش فراخ ولحمة كان يكسر الأطباق عليا ويضربني قدام عيالي ويضربني كمان علي أي سبب تاني زي لو لقاني بكلم والدتي وبضحك معاها وسايباه كان ينزل فيا ضرب بعصاية المقشة والخرطوم وكل ده بسبب المخدرات والحشيش اللي كان بيشربهم ".

خطيبة جوزي القديمة كلمتني وقالتلي أنا كنت في شقتك ومع جوزك 

وتابعت هدير :" والد جوزي توفي وروحنا ندفنه في محافظة تانية بعيدة عن القاهرة وجوزي وقتها مجاش معانا يدفن أبوه وقالي عشان الشغل ومش هعرف أخد أجازة في الوقت ده لقيت رقم غريب بيكلمني وكانت واحدة ست ولما قولتلها " انتي مين وجيبتي رقمي منين ؟ " قالتلي " أنتي متعرفنيش ؟ أنا خطيبة جوزك القديمة وبكلمك أقولك ان جوزك هيتجوز عيكي قريب وعايزاكي تنضفي نفسك " قولتلها " وأنتي عرفتي منين ؟" قالتلي " جوزك لحد أنهاردة بيكلمني وبيقابلني وبيديني 200 جنية عشان أوافق أقابله وأنا كمان بجيبله هدايا وهتلاقي منهم ساعة سودة هو بيلبسها وكنت لسة عندك في الشقة بأمارة قمصان نومك اللي متعلقة في نص الدولاب وكان مأكلني كمان سمك وشربنا بيرة " قولتلها أنا مش مصدقاكي وأنتي خرابة بيوت وقفلت معاها".

قالي أنا كنت جايب خطيبتي القديمة تعملي صنية بطاطس 

وأستكملت :" ولما رجعت البيت لقيت فعلا السمك والبيرة مرميين في الزبالة ولما شوفت جوزي بعد ما رجعت من دفنة أبوه عرفته أن خطيبته القديمة كلمتني وقالتلي كل حاجة وهو قالي " ده أنا كنت جايبها تعملي صنية بطاطس وانتي مش موجودة وكنت ناوي أعمل معاها الحرام وربنا مقدرنيش  " كنت هطلق منه عشان خيانته ليا لكن هو حاول يصلح الدنيا وقالي نفتح صفحة جديدة ولو هي كلمتك تاني مترديش عليها وخد شريحة الخط بتاعي وكسرها عشان خطيبته القديمة متكلمنيش عليها تاني ".

شكاك جدا وكان بيقولي أنتي بتوري جسمك للرجالة علي النت بفلوس

وأضافت :" في مرة كنت غضبانة منه عند أهلي وهو جالنا وقعد مع والدي وحاول يصلح الدنيا لكن أحنا موافقناش قام وهو جاي ماشي من عندنا قال لوالدي واهلي كلهم أنا قولت اعمل اللي عليا معاكم وأتقي ربنا في بنتكم اللي هي أصلا بتكلم رجالة علي النت كل يوم وتاخد منهم فلوس مقابل انها توريهم جسمها قومت أنا لطشته بالقلم في الشارع كله والناس هما اللي حاشوني عنه ".

وقالت أيضا :" عندي أخ صغير عنده 23 سنة وهو الوحيد بتاعنا أنا واخواتي البنات ووالدتي وبنحبه وبنهتم بيه جدا وجوزي كان بيغير منه بسبب كدة وفي كل خناقة بيني وبينه كان يقولي " انتي أخوكي ده ديته عيل عنده 9 سنين يديله مطوة في جنبه علي الدائري " ده غير أن مراة أخوه كمان حاولت تقتل اول طفل ليا وهو عنده 3 أيام لما أبني كان عنده أرتجاه في المرئ وهي مسكت البزازة بتاعته وخرمتها بالسكينة عشان لما ييجي يشرب منها نفسه يتقطع منه ويموت فيها ولما كنت اسألها أنتي لية الكراهية دي كلها كانت تقولي " أنا نفسي أخد شخصية جوزك وأستبدلها بجوزي عشان هو احسن منه بكتير ". 

كان بيطلب العلاقة وأولادي صاحيين ولو خبطوا علينا يضربني 

وأستطردت :" جوزي كان بيطلب مني العلاقة في أي وقت حتي لو شايفني تعبانة والولاد صاحيين كان يقولي " مليش دعوة أنا عايز حقي خليهم يتفرجوا علي التليفزيون برة وندخل أحنا جوا " ولما كنت أسمع كلامه وحد من الولاد يخبط علينا واحنا مع بعض كان يقوم ينزل فيا ضرب ويقولي " أنتي هتخنقيني لية أنتي وعيالك ما تنيميهم " .

رفع عليا دعوي أنذار طاعة وانا حولتها طلاق للضرر

 وأختتمت :" طلبت منه كتير بعد الأهانة والبهدلة دي أنه يطلقني بس هو كان بيرفض ويقولي مش هطلقك عشان مش هديكي حق من حقوقك لحد ما لقيته رفع عليا دعوي أنذار طاعة وانا وكلت محامي وحولت القضية لطلاق للضرر وبالفعل اتطلقنا وهو اتجوز دلوقتي أخت صاحبه اللي كان بيكلمها من وأنا علي ذمته وكل مرة حد من عيالي يكلمه ويقوله " وحشتني يا بابا وعايزين نجيلك " كان يقوله " خلي أمكم تسلمكم ليا في المحكمة " وبعدها عملنا انا وأهلي كلهم " حظر " علي التليفون ودلوقتي أنا لو هشبه سنيني معاه بحاجة فأنا هشبهها بالسجن اللي بحمد ربنا أني خرجت منه ومش طالبة منه أي حاجة غير أنه يتقي ربنا في عياله وفي مرضهم لأنهم محتاجينله ومتعلقين بيه ".