روان داخل محكمة الأسرة: جوزي بيسرق أخواتي وبييجي يقولي خبيني منهم

" جوزي عينه دايما علي حاجة أخواتي وبيغير منهم " بتلك الكلمات روت روان من داخل محكمة الأسرة عن ماساتها مع زوجها الذي أعتاد علي سرقة أخوتها بدون علمهم لغيرته منهم ثم يطلب من زوجته أن تكتم علي الأمر حتي لا يفتضح أمره .

أخواتي عندهم شركات وجوزي عواطلي 

بدأت روان حديثها لـ تحيا مصر :" أنا وجوزي متجوزين من 5 سنين وعندنا بنتين جوزي كان شغال مشرف في مطعم وعمل مشكلة مع زبون ومشوه من الشغل ومن ساعتها وهو قاعد في البيت ومش بيشتغل وبقي بيشرب كمان مخدرات بكافة أنواعها وأنا عندي أخين رجالة في نفس عمر جوزي ومتجوزين وعندهم أولاد ومرتاحين في بيوتهم وعندهم شركة كبيرة من تأسيسهم للأدوات المنزلية علاقتهم بجوزي علي مدار ال5 سنين جواز كانت كويسة جدا لحد ما جوزي ساب الشغل وبدأ يشرب من وقتها وهو بقي بيعمل تصرفات غريبة جدا خليتهم يتغيروا معاه ".

جوزي بدأ يغير من أخواتي ويسرق لبسهم 

وتابعت روان :" جوزي في الوقت اللي قعد فيه من الشغل كان أخواتي بيحاولوا يساعدوه بأنهم يلاقوله شغل بديل للشغل الأولاني اللي هو سابه لكن هو كان بيرفض لا وكمان كان كل شوية يستلف منهم فلوس عشان يجيب  مخدرات ومكنش بيرجعهلم فلوسهم تاني ومش بس كدة ده كمان كنا لما نروح نزورهم في بيوتهم وهو معايا كان يدخل أوضتهم ويفتح الدولاب ويسرق اللي فيه سواء لبس أو فلوس أو أي حاجة يلاقيها في وشه ويفتح كمان تلاجتهم وياخد الأكل اللي فيها  ".

بعد ما كان يسرقهم كان يستخبي منهم عشان خايف 

وأختتمت :" كنت في كل مرة ألاقي حاجة أخواتي عندي في البيت واسأل جوزي " أنت جيبت الحاجت دي أزاي ؟" كان يقولي " جيبتها من عند أخواتك ما هما ربنا مديهم خير كتير مش هيجرا حاجة يعني " ولما كنت أهدده أني هفضحه عندهم وأقولهم أنه بيسرقهم كان يخاف ويترعب ويقولي" لو سألوا عني ولا جم يزورونا قوليلي قبلها  عشان أنزل وأسيب البيت لحد ما يمشوا " ولما أخواتي لاحظوا أن كل مرة جوزي بيمشي من عندهم فيها يلاقوا حاجتهم في البيت مش موجودة أتصلوا بيا أنا وقالولي " العيب مش علي جوزك العيب عليكي أنتي أنك متجوزة واحد حرامي ومش عايزين نشوف وشكم عندنا تاني " أتقهرت وحسيت بكسرة بعد ما أخواتي قاطعوني بسبب جوزي وكنت من جوايا بحس أن عندهم حق لأنهم ياما وقفوا جنبوا وساعدوا وهو في الأخر يعمل معاهم كدة جيت المحكمة عشان أخلعه لأنه رفض يطلقني لكن أنا عايزة أخلص منه ده واحد عواطلي وبيشرب وكمان خسرني أخواتي وأهلي وأنا مش عايزة أعيش معاه يوم واحد تاني ".