عفاف شعيب عن وفاة أحمد زكي: عرفت إنه مش هيكمل بعد دور حليم

كشفت الفنانة عفاف شعيب تفاصيل الفترة الأخيرة قبل وفاة أحمد زكي، وذلك في حوارها ببرنامج واحد من الناس مع الإعلامي عمرو الليثي. 

تحيا مصر يرصد لكم تفاصيل الفترة الأخيرة في حياة الراحل أحمد زكي

عفاف شعيب: أحمد زكي جاني قبل ما يعيا وقالي هعمل حليم 

وقالت شعيب: قبل ما يعيا العيا الكبير جاني البيت وقالي انا هعمل حليم قولتله انا عارفة انك بتحبه بس هتعمله ليه؟ عشان ساعتها حسيت بحاجة جوايا انه مش هيكمل لما يعمل الدور ده، لأنه كان عاشق للسادات وجمال وحليم، قولتله بلاش قالي لا هعمله. 

وتابعت: وبعدين عيي وتعب وبقى يكلمني من المستشفى وروحتله ٣ مرات، وكل ماروح الاقي ناس مالهومش لازمة ولا كان بيحبهم وبيقولي فارضين نفسهم عليا، لما توفى كنت بتكرم في اليمن، واخويا قالي الخبر قولتله لا متقولش كده، وساعتها عملوا عزاء كبير وخدت العزاء أنا وأخويا.

عفاف شعيب: أحمد زكي كان بيقعد على جنب يعيط لهذا السبب 

وتابعت متحدثة عن الراحل أحمد زكي: كان أخ وبيصعب عليا وطيب، وكان في ناس كتير بتنبذُه، وواحد من الاساتذة الكبار قالوله انت هنا بتهبب ايه روح اشتغل في ورشة، وهو كان بيروح يقعد على جنب وبيعيط. 

وأضافت عفاف شعيب: وبقول احمد زكي موهوب، واحنا في سنة اولى كنت لما اروح الكافيتريا بعزمه على سندوتشات، ولما بدأت اراقبه لاقيته غلبان اوي وقاعد لوحده، ساعتها صعب عليا اوي، وقولتله اقعد معانا جه وقعد يعني موعود، راح غناها كاملة كأن عبد الحليم حافظ جوا ودانك. 

أخر أعمال عفاف شعيب في الدراما 

وكانت آخر أعمال الفنانة عفاف شعيب هو مسلسل زي القمر، حيث شاركت في حكاية واحد في المية، وكانت من بطولة صابرين، عفاف شعيب، الفنان مدحت صالح، والعمل من تأليف نداء الشندويلي وإخراج أحمد شفيق.

وتدور أحداث مسلسل واحد في المية حول مرض جيني يصيب الإنسان ويضعف بصره إلى أن يفقده، ومن خلال المسلسل نتعرف على مشاكل هؤلاء الأشخاص فـ "أمل" كانت ترى في السابق لكن الآن خسرت نظرها، لذا لا يتم معاملتها مثل الشخص المولود مكفوف من البداية، لا تجد فرص عمل مناسبة ودائما تسعى للحصول على وظيفة.