منار تطلب الخلع : جعانة جوزى بيشترى الأكل عشان يصوره ويرجعه تانى

" جعانة وبموت معاه من قلة الأكل والبخل، بيجيب الأكل ويوزعه فى التلاجة عشان يصوره ويأخد لقطات حلوة ينزلها على الفيس بوك على صفحته أو يبعتها لأهلنا عشان يوريهم أنى كل حاجة عندنا، وبمجرد ما اللقطة تخلص يجمع الأكل تانى وينزل بيه معرفش إذا كان بيرجعه ولا بيروح به عند أمه، بقالى سنة عايشة معاه على الفول والجبنة ومش بأكل لحمة ولا فراخ غير لما أهلى يبعتوا ليا، والغريب أنه مش مكسوف من نفسه وينزل يأكل معانا " جاءت هذه الكلمات على لسان منار وهى داخل محكمة الأسرة لرفع دعوى الخلع من زوجها بعد عام واحد فقط من الزواج مبررة استحالة العشرة معه .

تحيا مصر

وقالت منار فى مستهل حديثها مع " تحيا مصر "، اتجوزت من سنة واحدة جواز صالونات ودخل علينا بالهدايا والمظاهر الكدابة، لحد ما اتخدعنا فيه وافتكرت أنه إنسان كريم، لكن بعد ما اتجوزنا اكتشفت أنه بخيل جدا عليا وعلى الرغم من كدا بيحب المظاهر أول شهور كنا عايشين على الأكل اللى أهلى بيبعتوه عشان لسه عروسة جديدة، وبمجرد ما الأكل خلص كل يوم يشترى لينا فول وطعمية، لحد ما فى يوم كان داخل عليا باللحوم وخزين وعصاير كنت هطير من الفرحة وقولت انى ظلمته، لكن اتفأجت أنه اخد الحاجة بعد ما صورها لقطات فى التلاجة .

دعوى الخلع بمحكمة الأسرة 

واكملت الزوجة حديثها، أول ما دخل بالحاجة من باب الشقة بدأ يظبط كل حاجة فى التلاجة ويصورها لقطات وصور كتيرة وفى الآخر أحطها فى أكياس ونزل بيها بقوله أنت واخد الحاجة على فين لقيته بيقولى “ كفاية أنك شوفتيها أحمدى ربنا ” ، وبعدها لقيت كل اهلنا بيتكلموا على كرمه فى البيت والصور اللى بعتها وأنه معيشنى فى نعيم وانا فى الحقيقة بموت من الجوع اقسم بالله .” 

وأختتمت حديثها فى دعوى الخلع التى قدمتها بمحكمة الأسرة ، يعنى بخيل وبيحب المظاهر، عشان كدا قررت افضحه قدام أهلنا، وأثبت أنه إنسان بخيل رغم ظروفه المادية الميسورة، ورفعت دعوى خلع فى محكمة الأسرة بشمال الجيزة وأثبت أنه بخيل وسايبنى بالجوع ومازالت الدعوى منظورة أمام القضاء.