محمد شاهين عن الليلة واللي فيها: "المسلسل وجه الناس تروح لدكتور نفسي وميتصنفش جرئ" | خاص

كشف الفنان محمد شاهين في حواره مع تحيا مصر عن بعض الأسرار وكواليس استعداده لشخصية “أيمن” بمسلسل اللي واللي فيها الذي حقق نجاح كبير بعد انتهاء عرضه خلال الأيام الماضية.

وقال الفنان محمد شاهين لـ تحيا مصر عن أسباب حرصه على أخذ دور في مسلسل “الليلة واللي فيها”: انا كنت عايز اشتغل مع أستاذ هاني خليفة، وكان في فرصتين قبل كده ومكنش ليا حظ اشتغل معاها، وقالي يلا نعمل المسلسل قولتله أنا معاك، من قبل ماعرف الورق فيه ايه.

وتابع شاهين: بعتلي الورق من قبل ما نصور بسنة، وانبهرت وبوقي اتفتح وقولت مقدرش مشتغلش المسلسل ده، عشان حلو جدًا وفيه إثارة وتشويق. 

محمد شاهين عن أسباب تأخير طرح “الليلة واللي فيها”

وعن سبب تأخير طرح المسلسل، قال محمد شاهين: كان في ديكور بيتبني، وكذا حد من الممثلين كان بياخد ورشة تمثيل، ومواعيد وأنا بردو كنت بصور حاجة، وزينة كانت بتصور حاجة، وقعدنا بنصور من 6 لـ 7 شهور، وخلصناه من أقل من سنة.

وعن الاختلاف الكبير بين شخصيته في مسلسل “الليلة واللي فيها” عن شخصيته في “سوتس بالعربي” قال: صورت دور أيمن، قبل ماصور قدري، وهو اتعرض بعديه وكانت حاجة كويسة عشان الاتنين غير بعض، وقبلهم كان في دور خالد في مسلسل موضوع عائلي.

محمد شاهين عن تصنيف “الليلة واللي فيها” بالمسلسل الجرئ

وعن رأيه في تصنيف المسلسل تحت بند الأعمال الجريئة قال: المسلسل فيه جرأة عشان محدش اتكلم في الموضوع قبل كده، بس مكنش في أي مشاهد فيها حاجة تخدش أي إنسان في الدنيا، ومكنتش حاجة تخوف إني أعمله، والمسلسل ساعد إن لو حد بيعاني من أي حاجة زي كده يروح لدكتور نفسي يتخلص من مشاكله ويتعالج، وهي شخصيات موجودة وعايشة وعندنا دكاترة متخصصين ومكنش عندي خوف إني أعمل الدور ده.

أما عن تصنيف دوره في المسلسل تحت بند الشخصيات “المضطربة” قال: أيمن شخصية عادية مش مضطربة، شاب طموح وشاطر في شغله، عايز يستقر ويبقى مستقر في حياته الزوجية، وكل حاجة عنده فيها استقرار ماعدا علاقة مامته بمراته، وعلاقته هو بمراته الشخصية جدًا.