نادية الجندي: ياسمين عبد العزيز اتعرضت لحروب كتير.. والفنان لازم يبقى قدوة

كشفت الفنانة نادية الجندي عن علاقتها بالفنانة ياسمين عبد العزيز، في الجزء الثاني من لقائها ببرنامج حبر سري الموسم الثالث.

تحيا مصر يرصد لكم تصريحات نادية الجندي عن ياسمين عبد العزيز 

نادية الجندي: ياسمين عبد العزيز جميلة وتجنن

وقالت نادية الجندي: بحب ياسمين عبد العزيز، هي جميلة وتجنن، واتعرضت لمجموعة من الحروب.

 وتابعت: كلمة فنان دي لازم يبقى ليها معنى عند الناس، الفنان لازم يبقى رقيق وقدوة، وزمان لما كان الفنان بيتسأذن من زميله اللي رفض الدور يعمله ولا لأ؟.

نادية الجندي تتصدر التريند

وعن سبب تصدرها التريند بمجرد طرحها صورة عبر انستجرام، قالت: الناس مشتاقة ليا وبتحبني، ما بتصدق تشوفلك صورة، أنا مبحرقش نفسي وبحب استنى عشان الناس تشتاقلي، ولما بنزل بعمل عمل فني بيكون كويس ومش بستهتر بحب الجمهور ليا وبحترمه وفي ثقة بينا.

نادية الجندي: أفلامي بتكسر الدنيا والجيل الجديد متتبعني

وعن شعورها بعد تحطيم زملائها الأرقام القياسية بأعمالها، قالت: عمري ما حسيت بالغيرة من حد، لأن كل واحد ربنا بيكتبله رزقه وشغله، ومش لازم يبص في ايد اللي في غيره، وأنا متصالحة مع نفسي.. ومش محرومة من النجاح، وأفلامي بتنجح وتكسر الدنيا، لكن مغيرش وأي حد من زملائي بينجح بباركله.
وتابعت: أنا باركت لـ منى زكي على لعبة نيوتن، عشان أدائها كان رائع، وأي حد بيعمل دور حلو بكلمه وبباركله؟
وأضافت: الجيل الجديد متتبعني، والسوشيال ميديا فيها كل الأجيال، وأنا فلامي بتتعرض على كل القنوات.

نادية الجندي عن والدتها الراحلة

وقد تحدثت نادية الجندي عن دور والدتها الراحلة في حياتها، قائلة: فراق والدتي مغيرش نظرتي للحياة، بس كان ألم بالنسبالي، لأنها كانت سبب دخولي الفن عشان ممنوع بنات العائلات يدخلوا الفن، ووالدي كان راجل متدين وعصامي، لكن ماما اللي شجعتني.

وعن بدايتها الفنية قالت: ماما أقنعت بابا ادخل الفن، وقالها الوسط صعب مش هتقدر تتأقلم معاه، قالها خلاص لازم تروحي معاها الأستوديو لأنها صغيرة ومتسبيهاش، ولازم تكمل دراستها.

وأضافت: ماما كانت بتيجي معايا التصوير وأنا صغيرة.. وماما اللي حببتني في الرياضة عشان اخس بسبب التمثيل ووقفت جنبي وساندتني وشجعتني وليها دور كبير في حياتي، وكانت أم حنونة وحاجات كتير افتقدتها فيها.