"مراتي بتستحمى في المناسبات و بقيت أقرف ألمسها".. مأساة رجب أمام محكمة الأسرة

"عيالي بقوا بيقلدوا مراتي ومبيحبوش الاستحمام وأهلي بطلوا يزورونا بسببها".. بتلك الكلمات روي رجب لـ تحيا مصر من أمام محكمة الأسرة عن معاناته بسبب أهمال زوجته لنظافتها الشخصية هي وأطفالها مما أضطره للأنفصال عنها والسير في أجراءات الطلاق.

«عملت عليا شريفة و طلعت رقاصة».. مروان أمام محكمة الأسرة عرفت حقيقة مراتي بعد 5 سنين جواز

"جوزي بيبعت صوري بقميص النوم للرجالة عشان الفلوس"مأساة هاجر أمام محكمة الأسرة

مراتي كانت ست نضيفة جدا قبل الجواز

بدأ رجب حديثه لـ تحيا مصر من أمام محكمة الأسرة:"مراتي كانت ست نضيفة وحلوة جدا ودايما ريحتها حلوة و كل البنات كانت بتغير منها وأنا زي أي راجل حبيت فيها أهتمامها بنفسها وقررت أخطبها وأتجوزها وأبني معاها بيت وأسرة لأنها كانت عاجباني في جوانب تانية كتير حتي أهلي لما أتعرفوا عليها في البداية كانوا مبهورين بيها بنضافتها في كل حاجة حتي في البيت عندهم لما كنا بنزور أهلها وده طمن أهلي ليها جدا وخصوصا والدتي".

مراتي أهملت نفسها ونضافتها بعد الخلفة 

وتابع رجب:"بعد الجواز كمان شوفت معاها اللي مكنتش أحلم بيه كنت دايما أرجع من الشغل الاقيه البيت متزوق ونضيف ومترتب وكان أهلي لما يزوروني كانت راسي بتبقي مرفوعة قدامهم بسبب اهتمام مراتي بيا وبالبيت لكن بعد الخلفة كل حاجة أتغيرت أنا ومراتي خلفنا ولدين وبنت وطبعا كانوا أشقيا جدا ومتعبين وخصوصا أننا خلفناهم ورا بعض ومراتي مكنتش بتلحق ترتاح من تعب الحمل والرضاعة لكن هي برضه مش أول ولا اخر ست تخلف بدأت كل حاجة تتغير بقيت أشوفها بتستحمي في الأعياد والمناسبات وحتي البيت بقي بيتراكم فيه التراب ويتهمل بالأسابيع أهلي في البداية لما كانوا بييجوا ويشوفوا الوضع ده كانوا بيتكلموا معاها وينصحوها لكن مرة في التانية لما مكانتش بتعمل بنصيحتهم بطلوا يزورونا خالص وبقوا بيقولولي:"لو عايز تزورنا تعالي أنت لوحدك ومتجيبش مراتك عشان مش بنستحمل ريحتها". 

بقيت أقرف ألمسها 

وأستكمل:"نضافة البيت كان مقدورعليها وحاولت أحلها بأني أجيب شغالة للبيت تيجي تنضف وتلمع الشقة أول باول عشان نقدر نعيش فيها لكن نضافة مراتي الشخصية هي اللي مكنتش عارف أتصرف فيها أزاي لدرجة أن لما الموضوع زاد بقيت أقرف كمان أكل من أكلها أو ألمسها وأعمل معاها علاقة زي أي زوجين وهي لما خدت بالها أني مش بقرب منها وكانت بتسألني كنت في البداية بتدعي أي أسباب تانية عشان مجرحش مشاعرها لكت مؤخرا بقيت أواجهها بالسبب الحقيقي وعرفتها أنها لو مهتمتش بنضافتها وبنفسها هيتم أنفصالنا بشكل رسمي وبالرغم من كدة ده مأثرش عليها في أي شىء وحتي لما كانت بتعمل حساب لكلامي كانت بتهتم بنفسها يوم ولا يومين وبعدين ترجع لعادتها وأهمالها تاني وحاليا أنا ماشي في أجراءات طلاقنا عشان أرتاح وأخلص منها ومن اللي كنت عايشه معاها ".