خان العيش والملح.. تفاصيل مقتل مزارعين الهرم: شاب خلص عليهم ورماهم في الترعة
ADVERTISEMENT
«ده أكل معاهم وشرب الشاي وبعد فتره خانهم وقتلهم ورمى واحد في الترعة والتاني ضربه على دماغه ورماه في الأرض» كلمات أطلقتها أسرة الحج إبراهيم في حديثها مع تحيا مصر لتروي تفاصيل مقتله وصديقه على يد شاب بالهرم.
صداقة المجني عليهم
وقالت زوجة المجني عليه إبراهيم :"جوزي عنده 72 سنة وصديقه فاروق عنده 83 سنة المجني عليهم وهما أصدقاء من 10 سنين, بياكلوا ويشربوا و يزرعوا سوا في الأرض جنب بعض, والمتهم ده أكل معاهم عيش وملح وهو بيزرع جنبهم بامية في أرضه وفي النهاية خلص عليهم سوا".
قبل الواقعة بشهر
وتضيف الزوجة:"قبل الواقعة بشهر كان المتهم قاعد مع جوزي , وكلوا مع بعض وشربوا شاي, وبعد ما جوزي سابه علشان يروح يشوف الميه وصلت لحد فين في الأرض، والمتهم وهو ماشي سرق منه كل اللي في جيبه , وكان كل اللي معاه يومها 65 جنية في جلبيته اللى سايبها جنب الموتور، وبعد ما شوفناه تاني قولناله يعني تاكل وتشرب معانا وفي الأخر تسرقنا".
تفاصيل يوم الواقعة
وأوضحت الزوجة:" يوم الواقعة لما راح جوزي الغيط الصبح و بعدها اتأخر عليا , روحت أدور عليه في الغيط, لقيت فاروق صديقه مرمي علي الأرض ومضروب في دماغه وميت ولقيت شبشب جوزي علي حافة الترعة, في اللحظة دي فضلت أصرخ وأقول بيتي أتخرب بيتي أتخرب جوزي في الترعة, وقعدت أعيط، والناس أتلمت عليا واكشتفوا الجريمة بعد كده ووجدوه في الترعة".
مش عارفة هعيش إزاي من بعده
وختمت زوجة المجني عليه:" أنا مليش مصدر دخل من بعده, ببيع شوية خضار وكان هو اللي ساندني, ومش عارفة هعيش إزاي من بعده, وأنا عايزة راجلي, عايزة حق جوزي من المتهم".
المتهم كان مدبر للجريمة
فيما قال شقيق المجني عليه :"قبل الواقعة بـ 4 أيام طلب أخويا من المتهم إنه يبعد عن الأرض بتاعتنا ويشيل الخيمة اللي عاملها جنبنا, وإلا هيبلغ عنه لأنه كان حرامي ومعروف بسوء سلوكه, وجاوبه المتهم يومها وقاله مش هتلحق, ومكناش فاهمين ساعتها إنه ناوي يقتله".
وأضاف: " أنا عرفت بالواقعة لما رجعت من صلاة العشاء للبيت وكنت هنام، لقيت ابني بيتصل بيا وبيقولي إني أخويا لقيوه مقتول ومرمي في الترعة جنب الأرض هو وصاحبه فاروق، وروحت أجري وأتعكز على ابني علشان أوصل للمكان ولقيت فاروق ميت وأخويا جوا المية في الترعة بس أنا نظري ضعيف مشوفتوش غير لما طلعوه من الترعة".
ضبط المتهم
وأوضح:" لما المباحث جات وكانت الساعة 10 بالليل قعدوا يدورا على القاتل وقبضوا على 4 أشخاص منهم المتهم وخرجت البرىء منهم، واكتشفنا إن المتهم اللى أكل وشرب ومعاهم خلص عليهم وسرقهم قبل ما يمشي، وأخد العجلة وباعهم لواحد بتاع روبابكيا بـ 70جنيه".
أخويا مرض جزام
وأوضح شقيق المجني عليه:" المتهم مصعبش عليه أخويا المريض بمرض الجزام من 35 سنة، ولا سنهم الكبير هما الاتنين، ومفيش بينهم أي علاقة غير إنه جارهم في الأرض بس، وكمان إزاى هيصاحبوا واحد شاب عنده 30 سنة ده من دور أحفادهم".
عايزين الإعدام
واختتم شقيق المجني عليه:" احنا مش عايزين غير الإعدام, عشان مش هينفع أشوف المتهم وأبقي عارف إن هو اللي قتل أخويا واسيبه يمشي قدام عينيا كده، وبنشكر المباحث اللى مسبتناش لحظة من ساعة الجريمة حتى القبض على المتهم، واحنا واثقين في القضاء الى هيجبلنا حقنا".
جوجل نيوز
تطبيق نبض
