رنا أبو السعود لـ شيرين عبد الوهاب: "كفاية برامج عشان فن إجادة الكلام مش عندك"

حلت رنا نجلة الموسيقار حسن أبو السعود، ضيفة بموقع تحيا مصر، لتتحدث عن الأزمة التي أثارتها شيرين عبد الوهاب بعد تنمرها على الراحل أبو السعود.

تحيا مصر يرصد لكم تصريحات رنا أبو السعود بعد تنمر شيرين عبد الوهاب على والدها

رنا أبو السعود لـ شيرين عبد الوهاب: "من غير ما تعتذر مسامحاها"

وقالت رنا أبو السعود: شيرين من غير ما تعتذر انا مسامحاها، لازم نستحمل بعض، ولو هي شتمتني انا شخصيًا، يبقى الله يسامحك ويهديكي ويصلح حالك.
وتابعت مدافعة عن شيرين، قائلة: كفاية هجوم عليها مش هبقى أنا والسوشيال ميديا عليها، وأبويا لو كان عايش كان كلمها وهزر معاها وشتمها شتيمة خفيفة، وهو اللي معلمنا إن في حساب وقد ايه حصل مشاكل مع ناس وهو مردش فيها خالص.

رنا أبو السعود: "بابا اللي اكتشف شيرين عبد الوهاب"

وأردفت رنا قائلة: بابا روح الفكاهه عنده مع جميع خلق الله، واقرب واحد ليه بواب العمارة، وشيرين انا دخلت مرة لاقيت واحدة طالعه بالبيجامة وكانت شيرين وبابا محتضنها، جاتلنا البيت عشان بابا يسمع صوتها وقالها هتبقي نجمة، وكان سبب لظهورها.

رنا أبو السعود: "بابا اكتشف جورج وسوف وراغب علامة  وبهاء سلطان"

واستكملت نجلة حسن أبو السعود كلامها: جتلنا البيت عشان بابا يكتشفها، وهو اللي مكتشف جورج وسوف وبهاء سلطان وراغب علامة، ورحب بيها واتأثر بيها جدًا، والبداية كانت من عندنا في البيت، وبابا اداها مفتاح شقة اسكندرية في شهر العسل عشان تقعد هناك.
رنا أبو السعود توجه رسالة لشيرين عبد الوهاب 

ووجهت رنا أبو السعود رساله لشيرين عبد الوهاب تنصحها بعدم ظهورها في أي برامج مرة أخرى، وأن تركز في فنها أكثر من اللقاءات التي تظهر فيها، قائلة: كفاية وركزي في شغلك ومتطلعيش في برامج تاني عشان هتدخلي في مشاكل مش هتطلعي منها، ومش هتلاقي دايمًا زي عائلة حسن ابو السعود تسامحك، وركزي في الفن، عشان فن إجادة الكلام مش عندك وده مش عيب في فنانين كبار مش بيطلعوا في اي لقاءات خالص.