عفاف أمام محكمة الأسرة: جوزي نصب عليا في شقى عمرى ورماني أنا والعيال

«أنا معرفش أيه اللى حصل، بس أنا متأكده إنه اتنصب عليا ودهبي كله إتاخد وفلوسي اللى حوشتها وكل ده ومعرفش أنا عملت أيه وأتمنع من السفر ليه طيب».. تلك كلمات الزوجة عفاف وهى بمحكمة الأسرة إلتقاها تحيا مصر لتروي قصتها مع زوجها.

فتقول عفاف البالغة من العمر 32 سنة:" أنا أتجوزت من 10 سنين من جوزى ويعمل في المقاولات ، ولدي 4 أطفال، وكنا عايشين في مصر بدار السلام، وأنا عرضت عليه إننا نسافر للخليج وبعت الدهب وسافرنا وكان معايا وقتها طفلين فقط، واشتغلنا هناك بدبي في الإمارات".

وتضيف عفاف: "أنا اشتغلت في البيوت المالكة، وهو اشتغل بمهنته، وفضلنا 4 سنين هناك واشتريت حاجات كتير كدهب وأجهزة وشقق وأصبحنا من أصحاب الأملاك، وبعد فترة من سفرنا جوزي أخبرني بإنه لازم الفلوس بتاعتى ودهبي وكل حاجه تبقى معاه هو مش معايا أنا، وأنا معرفش السبب أيه ولكن هو قالى أن دول الخليج مينفعش الست تملك فلوس، وكل حاجه في أيدي الراجل مش الست وأنا وافقت وأعطيته كل الفلوس بتاعتى علشان يخليها معاه وعلشان أحنا واحد ومش هيفرق مين معاه الفلوس ومن مش معاه.

وتستكمل الزوجة عفاف: "جوزي طلب منى إني لازم أنزل مصر وأطمئن على حماتي علشان تعبانه وأبعتلها فلوس، وأنا قولت بالمرة أسلم على أمى لأنها كانت وحشاني، بقالى 4 سنين مشفتهاش، وخدت العيال معايا علشان كنا في الإجازة ويشوفوا أهلهم، ولما سافرت أعطانى فلوس لمدة أسبوع وأنى هرجع تاني ولكنى الصدمة والمفاجئة لما وصلت مصر اتقطع اتصالاتنا ومبقاش يتصل، وتانى حاجة لما حاولت أرجع للإمارات، لقيت نفسي ممنوعه من السفر خارج مصر، والمفروض أنى أفضل محبوسة لحد ما جوزي يجى، وجوزي لا حس ولا خبر عنه".

وتتعجب عفاف وتقول: "أنا جوزي فضل على الموضوع ده لمدة سنة، وأنا معرفش عنه حاجه ورق عيالى كله هناك في دبي، أنا معرفش أيه اللى حصل، بس أنا متاكدة أن دى عملية نصب هو قام بيها عليا، وأنا روحت خلعته وهرفع نفقة علشان العيال دى مين اللي هيصرف عليهم، ودي كل حكايتي مع جوزي النصاب".