بعد مرض زوجها .. الحاجة فاطمة ترتدي ثوب الكفاح وتعمل في قهوة شعبية لإعالة أسرتها بكفر الشيخ
داخل مركز دسوق بمحافظة كفرالشيخ وفي أحد المقاهي الشعبية علي النيل تقف سيدة سبعينية العمر خلف ماكينة الشاي تؤدي عملها يوميًا بكل جد واجتهاد بعد أن أجبرها مرض زوجها على تحمل المسؤولية ومساعدته في توفير نفقات المعيشة وتربية ابنيها.
عرفينا بنفسك؟
اسمي فاطمة عندي 71 سنة من مدينة دسوق وعندي ولدين ابراهيم وسامي وبشتغل في القهوة دي من فترة بعد ما جوزي تعب ومبقاش قادر يشتغل زي الأول.
إزاي بدأت الشغل في القهوة؟
جوزي كان هو اللي ماسك شغل القهوة ولما صحته تعبت والدخل قل لقيت نفسي لازم أقف جنبه ونزلت أشتغل مكانه علشان نعرف نصرف على البيت ونكمل مصاريف الأولاد.
هل قرار العمل كان سهل ولا صعب؟
لا طبعًا في الأول كنت مترددة وخايفة من كلام الناس لكن لما لقيت المسؤولية كبيرة ومفيش مصدر دخل كفاية قررت أشتغل ومبصتش لأي كلام.
عرفنا يومك داخل المقهى كان بيمشي ازاي؟
ببدأ من الصبح بنظفة المكان وبعد كدا اجهز الشاي والقهوة وأنظم المكان وأخدم الزبائن وأحيانًا أفضل موجودة لساعات طويلة لكن الحمد لله متعودة على الشغل وبعمل اللي أقدر عليه.
هل واجهت انتقادات بسبب عملك في المقهي ؟
في البداية كان فيه ناس مستغربة لكن مع الوقت الناس شافت إني بشتغل علشان بيتي وأولادي والحمد لله أغلب الناس بقت تحترم تعبي.
هل تتعرضين لأي مضايقات أثناء العمل؟
في البداية لكن دلوقتي الحمد لله المضايقات قليلة جدًا ومعظم الزبائن بيقدروا ظروفي ويحترموني ولو حصل أي موقف بسيط بحاول أتعامل معاه وفيه ناس كتير واقفة جنبي.
ما أنواع المشروبات التي تقدمونها في القهوة؟
بنقدم الشاي بأنواعه والقهوة السادة والمظبوط والزيادة وكمان المشروبات الساخنة المعتادة زي اليانسون والسحلب في موسم الشتاء حسب طلب الزبائن وكمان بنقدم الشيشة لأنها طلب أغلب الزباين.
في حد بيشتغل معاكي في المقهي هنا ؟
أيوه ابني الصغير خصوصًا لما يكون المكان زحمة وده بيسهل علي الشغل ويخليني أقدر أخدم الزبائن بشكل أفضل.
ما أصعب موقف مر عليك ؟
أصعب حاجة لما جوزي توفي
ما الرسالة التي توجهينها للسيدات والشباب ؟
أي شغل شريف مفيهوش عيب والست القوية هي اللي تقف جنب أسرتها وقت الشدة والمهم إن الإنسان يشتغل بالحلال ويحافظ على كرامته وبالنسبة للشباب انزلو اشتغلوا اي حاجة المهم تكون حلال علشان ربنا يراضي عنك .
رسالة انتي ماشية بيها في حياتك ؟
الحياة مش سهلة لكن طول ما الواحد بيجري على رزقه بالحلال ربنا هيكرمه
جوجل نيوز
تطبيق نبض
