أمير عزمي مجاهد: كريستيان جروس لم يعاني من الزهايمر وتعرض لحملات من داخل الزمالك لرحيله عن تدريب الفريق

قال أمير عزمي مجاهد المدرب العام السابق بنادي الزمالك، أن كريستيان جروس تعرض لحملة من أجل رحيله عن نادي الزمالك وهناك أشخاص داخل الجهاز كانوا يقوموا بنقل التفاصيل للإدارة بعد الاجتماع مع المدرب، ويستعرض موقع تحيا مصر تصريحات أمير عزمي مجاهد.

تصريحات أمير عزمي مجاهد

وأضاف أمير عزمي مجاهد في تصريحات تليفزيونية مع الإعلامي إبراهيم فايق على أم بي سي مصر 2، أتمنى من جمهور الزمالك يفرقوا ويعرفوا مين اللي بيحب الزمالك بجد، وفيه ناس كتير بتتزملك وهما مش بيحبوا نادي الزمالك، وأنا بحب الزمالك جداً ومش بحب أعمل لقطات وأبوس قميص النادي.

وأكمل أمير عزمي مجاهد، أنا كنت زعلان جداً في الفترة الماضية بسبب العديد من الأمور خارج الملعب، وجروس كان يتعرض لكلام غير جيد، وحصل قلة أدب وناس مش متربية، واللي يشكك في صحة المدرب فهو قليل الأدب، واللي يقول جروس بينسى يبقى قليل الأدب، وكنت زعلان جدا.

وزاد أمير عزمي مجاهد، يارب أكون عندي 70 سنة وأكون زي جروس، وهو فاكر كل حاجة، وفيه ناس لجان تابعة لنادي الزمالك هما السبب في معلومة زهايمر كريستيان جروس، وأي حد أتكلم على جروس بشكل خاطئ هما أغبية وكان فيه سكريبت، والبداية كانت بالزهايمر وبعد ذلك مش فاكر أسماء اللاعيبة.

أمير عزمي مجاهد مع إبراهيم فايق

وأشار أمير عزمي مجاهد، في يوم من الأيام كل الناس دي هتتكشف وربنا مش بيضحك عليه، وعندي القدرة أني أتكلم عن ناس "أخليهم يقلعوا هدومهم" بس مش عاوز أذكر أسماء، وكان في شخص في الجهاز بيتكلم يتكلم مع مجلس الإدارة وجروس كان عارفهم، وجروس أكبر من كده.

وأردف أمير عزمي مجاهد، جروس مدرب محترم، واشتغل لآخر يوم ليه مع الزمالك، وفيه ناس في مجلس الإدارة مش كانت عاوزاني في مجلس الإدارة لأني مش عصفورة، وجروس قرر تواجدي مع الزمالك ومجلس الإدارة كان يرفض تواجدي مع الفريق.

وأكمل أمير عزمي مجاهد، علاقة جروس بلاعبي الزمالك السابقين كانت رائعة، والناس اللي بتقول أن التمرين في الفترة الأولى كان رائع وفي الفترة الحالية سيء، ودي طريقة بلدي، وجروس كان يريد التعاقد مع صفقات للفريق وجروس لم يفشل مع الزمالك نهائيا، وكان يطالب النادي بالصفقات.